– તહેવારોને લઇ સેફ્ટી વાનની કામગીરી સઘન બનાવાઇ
– બોટાદમાંથી ફરસાણમાં વપરાતા 10 લીટર બળી ગયેલ તેલનો જથ્થો અને પછી ટમેટો સોસનો પણ નાશ કરાયો
ભાવનગર : જિલ્લા ફુડ વિભાગ દ્વારા તહેવારોને લઇ ફુડ સેફટી વાનની કામગીરી સઘન બનાવાઇ હતી અને જિલ્લાના મહુવા-તળાજામાંથી અખાદ્ય ૧૦ લી. તેલ તેમજ પાણીપુરીનું કલરવાળા ૫ લી. પાણીનો સ્થળ પર નાશ કરાયો હતો. આ સાથે બોટાદ શહેરમાંથી પણ ૧૦ લી. બળેલા તેલનો અને ૫ લી. ટમેટો સોસનો નાશ કરાયો હતો.
મળતી વિગતો મુજબ જિલ્લા ફુડ એન્ડ ડ્રગ વિભાગ દ્વારા ગત સપ્ટે. માસ દરમિયાન સ્થળ પર ચેકીંગ કરતી ફુડ સેફ્ટી વાન દ્વારા જિલલામાં સઘન કામગીરી હાથ ધરવામાં આવી હતી જે અંતર્ગત ભાવનગર જિલ્લાના તાલુકા મથકો પરથી દુધના ૧૦૨, તેલના ૩૫, મરી મસાલાના ૧૨૭, કોલ્ડડ્રિંક્સના ૨૧ મળી કુલ ૩૧૯ નમૂના ચેક કરવામાં આવ્યા હતાં. જ્યારે મહુવાના જાહેર રોડ પર પાણીપુરી વેચતા ફેરીયા પાસેથી અખાદ્ય પાંચ લીટર કલરવાળુ પાણી મળતા તેનો નાશ કરાયો અને તળાજામાં બળી ગયેલ ૧૦ લી. તેલના જથ્થાનો પણ નાશ કરાયો હતો. આ ઉપરાંત બોટાદ શહેરમાં આ સેફટી વાન દ્વારા તેલના ૨૨, મીઠાઇના ૧૦, મરી મસાલાના ૮૫, સોડાના ૧૦ સેમ્પલ ટેસ્ટ કરાયા હતાં. જ્યારે બોટાદના ફરસાણની લારી ગલ્લાવાળા પાસેથી બળી ગયેલ ૧૦ લીટર તેલના જથ્થાનો અને અન્ય ખાણી પીણીવાળા પાસેથી અખાદ્ય પાંચ લી. ટમેટો સોસના જથ્થાનો સ્થળ પર નાશ કરવામાં આવ્યો હતો. આગામી દિવાળીના તહેવારો અંતર્ગત લોકોના આરોગ્યની સુખાકારી માટે સેફટી વાનની કામગીરી વધુ સઘન બનાવવામાં આવશે તેમ સુત્રોએ જણાવ્યું હતું.
જિલ્લા ફુડ વિભાગે ભાવનગર અને બોટાદમાંથી 23 સેમ્પલ લેબમાં મોકલ્યા
જિલ્લા ફુડ વિભાગ દ્વારા ગત માસમાં ભાવનગરમાંથી મીઠાઇના ૮, ફરસાણના ૫, અન્ય ૧ અને બોટાદમાંથી દુધનો ૧, ઘીનો ૧, ખાદ્ય તેલનો ૧, મીઠાઇના ૪ અને ફરસાણનો ૧ મળી કુલ ૨૩ નમૂના રેગ્યુલર મેળવી લેબોરેટરી ટેસ્ટીંગ માટે મોકલ્યા હોવાનું જણાયું છે.
