ગોંડલ, જેતપુર, જસદણમાં આવેલી પેઢી સામે કાર્યવાહી
પૂરવઠા વિભાગની કામગીરીઃ ધોરાજી અને ઉપલેટાની ૪ પેઢીઓને પણ અનાજના અનધિકૃત ૫૨૨૧૩ કિલો જથ્થા પકડાતાં દંડ કરાયો
રાજકોટ: રાજકોટ જિલ્લા પૂરવઠા વિભાગ દ્વારા જિલ્લાના ગોંડલ,જેતપુર અને જસદણ તાલુકામાં આવેલી ૬ પેઢીઓમાં કરાયેલી તપાસમાં ભેળસેળયુક્ત પેટ્રોલિયમ પ્રવાહી વેચાણ,સંગ્રહ મળી આવતા જિલ્લા કલેક્ટર સમક્ષ કેસ ચાલી જતા કરવા ૧૮,૨૬૨ લિટરનો જથ્થો રાજ્યસાત કરીને રૂ।.૧૮,૧૨,૨૪૦નો દંડ ફટકાર્યો છે. આ પ્રવાહીનું પૃથ્થકરણ કરાતા તે બાયો ડીઝલની લાક્ષણિકતા સંતોષતું ન્હોતું. તેમજ ધોરાજીની એક અને ઉપલેટાની ૩ સહિત ૪ પેઢીઓમાં ૫૨,૩૧૩ કિલો અનધિકૃત સંગ્રહિત અનાજનો જથ્થો સીઝ કર્યો હતો જેમાં આ ચાર પેઢીને જથ્થાની કિંમતના ૧૦ટકા લેખે રૂ।.૧,૭૮,૮૮૯નો દંડ ફટકારાયો છે.
આ અંગે જિલ્લા પૂરવઠા અધિકારી અજય ઝાપડાએ આપેલ વિગતો મૂજબ (૧) રાજલ ટ્રેડર્સ (મુ.જામવાડી, રાજકોટ-જુનાગઢ હાઈવે, કનૈયા હોટલ પાછળ, ગોંડલ)માંથી ૭૦૦૦ લિટર લિટર પ્રવાહી રાજ્યસાત કરેલ છે (૨) જયપરશુરામ એન્ટરપ્રાઈઝ (જેતપુર-રાજકોટ હાઈવે, કાગવડના પાટિયા પાસે, મુ.કાગવડ તા.જેતપુર)નો સીઝ કરવામાં આવેલ ૧૬,૧૫૦ લિટર જથ્થા દલ કિંમતના ૧૦૦ ટકા લેખે રૂ।.૧૧,૬૨,૮૦૦નો દંડ અને (૩) પવન બાયો ફ્યુઅલ (જેતપુર-રાજકોટ હાઈવે, કાગવડના પાટિયા પાસે)માં ૯૦૨૦ લિટર જથ્થો સીઝ કરાયેલ જે બદલ રૂ।.૬,૪૯,૪૪૦નો દંડ કરાયો છે. (૪) જસદણ તાલુકાના હડમતિયા (ખાંડા)ના પાટિયા પાસે, ઘેલા સોમનાથ રોડ પર ખુલ્લા પ્લોટમાં ૬૦૦૦ લિટર શંકાસ્પદ પ્રવાહી તેેમજ (૫) ગોંડલ તાલુકાના પાટખિલોરી દેરડી-વાસાવડ રોડ પર ખુલ્લા પ્લોટમાંથી ૧૫૦૦ લિટર અને (૬) આટકોટ-ભાવનગર રોડ પર અનધિકૃત બાયોડીઝલ પંપમાંથી ૩૭૬૨ લિટર જથ્થો રાજ્યસાત કરાયેલ છે.
આ ઉપરાંત (૧) ધોરાજીના જુનાગઢ રોડ પર ગોડાઉનમાંથી ૩૬,૦૫૦ કિલો ઘંઉ-ચોખાનો અનધિકૃત જથ્થો મળતા રાજ્યસાત કરી કિંમતના ૧૦ ટકા લેખે રૂ।.૧,૨૩,૪૮૦નો (૨) ઉપલેટાના ૭પ્લાઝા એપાર્ટમેન્ટ સામે ડેલામાં ૧૦,૦૮૧ કિલો અનાજ રાજ્યસાત કરીને રૂ।.૩૧,૮૯૧નો (૩) ઉપલેટા તા.ના કોલકી રોડ ખાતે પસાર થતા વાહનમાંથી ૧૧૩૨ કિલો અનધિકૃત અનાજ રાજ્યસાત કરી રૂ।.૩૧૦૮નો અને (૪) રબારી ખડકી વિસ્તાર, નદી કાંઠો,ઉપલેટામાંથી ૪૯૫૦ કિલો અનધિકૃત અનાજ બદલ રૂ।.૧૩૪૧૦નો દંડ કરાયેલ છે.
