વડોદરા,ફતેગંજની વેબ મેમોરિયલ સ્કૂલના વિદ્યાર્થીઓ વચ્ચે સ્કૂલ છૂટયા પછી ઝઘડો થતા એક વિદ્યાર્થીએ બીજાના માથામાં પાણીનો બોટલ મારી દેતા ઇજા થઇ હતી.
ફતેગંજની વેબ મેમોરિયલ સ્કૂલમાં આજે શાળા છૂટયા પછી ધો.૮ નો વિદ્યાર્થી ઘરે જતો હતો. તે દરમિયાન તેના જ ક્લાસમાં ભણતા અન્ય વિદ્યાર્થીએ પાછળથી આવીને તેને માથામાં પાણીનો બોટલ મારી દેતા ઇજા થઇ હતી. ઇજાગ્રસ્ત વિદ્યાર્થીએ પરિવારને જાણ કરતા પરિવાર તેને લઇને ફતેગંજ પોલીસ સ્ટેશન પહોંચી ગયો હતો. ઇજાગ્રસ્ત વિદ્યાર્થીને સારવાર માટે સયાજી હોસ્પિટલમાં મોકલી આપવામાં આવ્યો છે. પોલીસનું કહેવું છે કે, વિદ્યાર્થીઓ વચ્ચે નજીવી બાબતે તકરાર થતા પ્લાસ્ટિકની બોટલ માથામાં મારી દીધી હતી. આ અંગે કોઇ અરજી કે ફરિયાદ થઇ નથી. બંને વિદ્યાર્થીઓના વાલીઓને સમજાવવામાં આવ્યા છે.
