વડોદરા,વારસિયા વિસ્તારમાંથી દારૃ ભરેલી રિક્ષા સાથે એક આરોપીને ઝડપી પાડયો છે. જ્યારે સિન્ધી ગેંગના સાગરીતને વોન્ટેડ જાહેર કર્યો છે. શહેરમાં દારૃની હેરાફેરી રોકવા માટે સિન્ધી ગેંગના બચી ગયેલા સાગરિતો અને સૂત્રધાર સામે પણ ગુજસીટોક હેઠળ કાર્યવાહી થવી જરૃરી છે.
પીસીબી પોલીસને માહિતી મળી હતી કે, વારસિયા કોટ વિસ્તારમાં રહેતો પ્રકાશ ગંગલાણી વિદેશી દારૃનો જથ્થો લાવ્યો છે. તેણે દારૃ ભરેલી રિક્ષા પોતાના ઘરની બહાર ઉભી રાખી છે. જેથી, પોલીસે ઉપરોક્ત સ્થળે જઇને તપાસ કરતા પ્રકાશ હોતચંદ ગંગલાણી (રહે. સંત કંવર કોલોની, કોટ વિસ્તાર, વારસિયા) મળી આવ્યો હતો. પોલીસે વિદેશી દારૃની મોંઘીદાટ ૭૫ બોટલ કિંમત રૃપિયા ૨.૩૮ લાખની કબજે કરી છે. પોલીસે દારૃ, મોબાઇલ ફોન અને રિક્ષા મળી કુલ રૃપિયા ૩.૧૪ લાખનો મુદ્દામાલ કબજે કર્યો છે. પોલીસે હાથ ધરેલી પૂછપરછ દરમિયાન સિન્ધી ગેંગ સાથે સંકળાયેલા વરસિયાના પ્રેમ સેવકરામ પહેલવાણીનું નામ ખૂલ્યું હતું. પોલીસે પ્રેમ પહેલવાણી, વિનોદ ગંગલાણી સહિત ત્રણને વોન્ટેડ જાહેર કર્યા છે. શહેરમાં દિવાળી નજીક આવતા જ પોલીસ દ્વારા દારૃના ધંધા પર ઉપરાછાપરી રેડ પાડવામાં આવી રહી છે. તેવા સંજોગોમાં બેફામ બનેલી સિન્ધી ગેંગ દ્વારા હજીય દારૃનો ધંધો કરવામાં આવી રહ્યો છે. ઉલ્લેખનીય છે કે, શહેરમાં દારૃનો ધંધો કરતા નિલુ સિન્ધી, અલ્પુ સિન્ધી સહિત અન્ય સામે પોલીસે લાલ આંખ કરી ગુજસીટોક હેઠળ ગુના દાખલ કર્યા છે. પરંતુ, બેફામ બનેલી સિન્ધી ગેંગના મનોજ પાપડ, પ્રેમ સહિત અન્ય આરોપીઓ હજી દારૃનો ધંધો કરી રહ્યા છે.
