વડોદરા, વડોદરા મ્યુનિસિપલ કોર્પોરેશન હસ્તકની નગર પ્રાથમિક શિક્ષણ સમિતિની વધુ ૧૨ શાળાના બિલ્ડિંગ બનાવવાનું ખાતમુહૂર્ત એપ્રિલમાં કરાયું હતું. આ કામગીરી માટે ૩૫ કરોડનો ખર્ચ થનાર છે.
૧૨ બિલ્ડિંગમાં ૧૭૩ કલાસ બનવાના છે. શિક્ષણ સમિતિ દ્વારા અગાઉ કેટલીક શાળાના નવા બિલ્ડિંગની કામગીરી શરૃ કરી હતી, જેમાંથી અંદાજિત ૧૮ કરોડના ખર્ચે ૬ શાળાના નવા મકાનોનું લોકાર્પણ કરાયું હતું.
જોકે હજી ઘણી શાળાના મકાનની હાલત જર્જરિત છે. સામાજિક કાર્યકરના કહેવા મુજબ શહેરના વાડી વિસ્તારમાં આવેલી જગદીશચંદ્ર બોઝ પ્રાથમિક શાળાનું બિલ્ડિંગ સારી હાલતમાં નથી. અહીં જગ્યા પણ ઘણી વિશાળ છે. નવા મકાન માટે ફંડ ઉપલબ્ધ હોવા છતાં વિદ્યાર્થીઓની સુરક્ષાનો વિચાર કરીને નવુ બિલ્ડિંગ બનાવવા માગણી કરી હતી. જ્યારે જે ૧૨ શાળા માટે ખાતમુહૂર્ત બાદ કામગીરી ધીમી ગતિએ થતી હોવાનો આક્ષેપ કર્યો હતો.
જોકે શિક્ષણ સમિતિના વર્તુળોએ કહ્યું છે કે શિક્ષણ સમિતિની કુલ ૧૬ શાળામાંથી હાલ ૪ શાળાનું કામ ચાલુ છે. વાઘોડિયા રોડ, તરસાલી, ગોરવા અને સયાજીગંજમાં ડિમોલિશન થઈ ગયું છે અને તરસાલીમાં તો કામ ચાલુ કરાયું છે. જે ખુલ્લા પ્લોટ હતા, તેમાં એકતાનગર ખાતે બાંધકામ પૂર્ણતાના આરે છે. પુષ્ટિ પ્રાથમિક શાળા અને ઝવેરચંદ મેઘાણી શાળાનું ટૂંક સમયમાં લોકાર્પણ કરાશે. જ્યારે સ્વામી વિવેકાનંદ શાળા જર્જરિત હતી અને તેની કામગીરી ચાલુ કરાઈ છે. જૂની બિલ્ડિંગોના સ્થાને નવી શાળાઓના બાંધકામની મંજૂરી મળી ગઈ છે અને બધી જ નવી નિર્માણ કરાશે. જેમાં ડિમોલિશનની કામગીરી પૂર્ણ થશે, તેમ બાંધકામનું કાર્ય શરૃ કરી દેવામાં આવશે.
