અમદાવાદ,રવિવાર
બેફામ વાહન હંકારવાના કારણે હિટ એન્ડ રન અને અકસ્માતમાં મોતના બનાવો વધી રહ્યા છે. ઠક્કરનગરમાં કારના ડ્રાઈવરે એક્ટિવાને ટક્કર મારતા યુવકનું મોત થયું હતું. જો કે અકસ્માત બાદ કારનો ડ્રાઇવર ભાગી ગયો ગયો હતો આ બનાવ અંગે ટ્રાફિક પોલીસે ગુનો નોંધીને સીસીટીવી ફૂટેજ આધારે વધુ તપાસ હાથ ધરીછે.
પોલીસનો ફોન આવતા પિતાને અકસ્માતની જાણ થઇ, માથામાં ગંભીર ઇજા થતા સારવાર દરમિયાન મોત
બાપુનગરમાં રહેતા વૃદ્ધે ટ્રાફિક જી ડિવિઝન પોલીસ સ્ટેશનમાં અજાણ્યા કાર ચાલક સામે ફરિયાદ નોંધાવી છે કે તેમનો 38 વર્ષનો પુત્ર તા.૨૫ના રોજ સાંજે એક્ટિવા લઇને ઠક્કરનગર ચાર રસ્તા પાસે આવેલ વસંતનગર છાપરા પાસેથી પસાર થતો હતો.
આ સમયે પૂરઝડપે આવી રહેલી કારના ડ્રાઇવરે એક્ટિવાને ટક્કર મારતા યુવક ઉછળીને રોડ ઉપર પટકાતા તેને માથામાં ગંભીર ઇજાઓ થઇ હતી. અકસ્માત બાદ કારનો ડ્રાઇવર ભાગી ગયો હતો. આસપાસના લોકોએ ઇજાગ્રસ્ત યુવકને સારવાર માટે હોસ્પિટલમાં લઇ ગયા હતા. પોલીસે ફોન કરતાં પરિવારજનોને અકસ્માતની જાણ થઇ હતી. જો કે સિવિલમાં સારવાર દરમિયાન ફરજ પરના ડોકટરે યુવકને મૃત જાહેર કર્યો હતો. આ ઘટના અંગે ટ્રાફિક પોલીસે સીસીટીવી ફૂટેજ આધારે વધુ તપાસ હાથ ધરી છે.
