વડોદરાઃ એમ.એસ.યુનિવર્સિટીની વિવિધ ફેકલ્ટીઓમાં ચાલતી કેન્ટિનોમાં યુજીસીના ધારા ધોરણનો અમલ કાગળ પર જ રહ્યો છે.આ બાબત પર સત્તાધીશોનું ધ્યાન હજી સુધી ગયું નથી.
યુનિવર્સિટીની વિવિધ ફેકલ્ટીઓમાં ચાલતી કેન્ટીનોમાં વિવિધ વાનગીઓ વેચાય છે અને તેમાંથી મોટાભાગની જંક ફૂડ છે.જે વિદ્યાર્થીઓના સ્વાસ્થ્ય માટે સ્વાભાવિક રીતે જ સારી હોય છે.આ બાબતને ધ્યાનમાં રાખીને યુનિવર્સિટી ગ્રાન્ટ કમિશન દ્વારા તમામ યુનિવર્સિટીઓને સૂચના આપવામાં આવી છે કે, કેન્ટીનોમાં ઓઈલ અને શુગર બોર્ડ ફરજિયાત રાખવામાં આવે અને તેની સાથે સાથે કેન્ટીનમાં શક્ય હોય તો પોષણયુક્ત નાસ્તાનો વિકલ્પ પણ વિદ્યાર્થીઓને આપવામાં આવે.ઓઈલ અને શુગર બોર્ડ મૂકવા પાછળનો આશય વિદ્યાર્થીઓને વિવિધ પ્રકારના નાસ્તામાં શુગરનું પ્રમાણ કેટલું છે અને તેમાં કેેટલી કેલેરી છે તેની જાણકારી આપવાનો છે.
જોકે યુનિવર્સિટીની કેન્ટીનોમાં આ પ્રકારના બોર્ડ મૂકવામાં આવતા નથી.બીજી તરફ વિદ્યાર્થીઓનું કહેવું છે કે, કેમ્પસની વિવિધ કેન્ટીનોમાં મોટાભાગે ફાસ્ટ ફૂડ અને તળેલી વાનગીઓનું જ વેચાણ થાય છે અને તેની સામે વેચાતી પોષણયુક્ત વાનગીઓનું પ્રમાણ ઘણું ઓછું છે.
કેન્ટીનોમાં વેચાતી વાનગીઓ
ચાઈનીઝ, પિઝા, ગાર્લિક બ્રેડ, સેન્ડવિચ, સમોસા, વડાપાંવ, બ્રેડ પકોડા, પફ, ઢોસા, આલુ પરાઠા, પોહા, મસાલા બન, બ્રેડ, ચણા મસાલા, બ્રેડ બટર જામ, સાબુદાણા વડા, દાબેલી, થેપલા અને કોલ્ડ ડ્રિન્કસ
સંખ્યાબંધ તળેલા નાસ્તામાં ૧૫ થી ૨૦ ગ્રામ ઓઈલ હોય છે
મોટાભાગની શૈક્ષણિક સંસ્થાઓની કેન્ટીનમાં મળતી સર્વ સામાન્ય વાનગીઓ જેવી કે, છોલે- પુરી, બ્રેડ પકોડા, ફ્રેન્ચ ફ્રાઈઝ, મન્યુચિરનમાં લગભગ ૧૫ થી ૨૦ ગ્રામ જેટલું તેલ હોય છે.જે લાંબા ગાળે વજન, કોલેસ્ટ્રોલ અને ચરબી વધારે છે.જ્યારે કોલ્ડ ડ્રિન્કમાં ખાંડના વધારે પડતું પ્રમાણ બ્લડમાં શુગર તો વધારે જ છે તેની સાથે સાથે દાંત પર પણ અવળી અસર કરે છે.વિવિધ કોલ્ડ ડ્રિન્કમાં ૨૦ થી માંડી ૩૦ ગ્રામ જેટલી સુગર હોય છે.
