બગીચામાં મળેલા યુવાને વિશ્વાસ કેળવ્યો
દર મહિને ૨૫થી ૫૦ હજાર રૃપિયા કમાવી આપવાનું કહીને રૃપિયા લઈ લીધા બાદ છૂમંતર ઃ પોલીસની તપાસ
ગાંધીનગર : ગાંધીનગર શહેર નજીક કુડાસણમાં રહેતા વૃદ્ધને શેરબજારમાં
રોકાણ કરવાની લાલચ આપીને દર મહિને ૨૫થી ૫૦ હજાર રૃપિયા કમાવી આપવાનું કહી યુવાને
૧૫ લાખ રૃપિયા લઈને છેતરપિંડી કરી હોવાની ઘટના બહાર આવી છે. જે સંદર્ભે હાલ
ઇન્ફોસિટી પોલીસ દ્વારા ગુનો દાખલ કરીને તપાસ શરૃ કરવામાં આવી છે.
હાલમાં શેરબજારના નામે છેતરપિંડીની ઘટનાઓ વધી રહી છે ત્યારે
આ વખતે ગાંધીનગર શહેર નજીક આવેલા કુડાસણમાં સહજાનંદ પાર્ક વસાહતમાં રહેતા અને
અમદાવાદ સિવિલ હોસ્પિટલમાંથી ચીફ લેબ ટેક્નિશિયન તરીકે નિવૃત્ત થયેલા દિગીશભાઈ
હારીતભાઈ દવે છેતરપિંડીનો ભોગ બન્યા છે. તેમણે નોંધાવેલી ફરિયાદ પ્રમાણે ગત
જાન્યુઆરી મહિનામાં તે અને તેમના પત્ની કુડાસણ ખાતે આવેલા કોર્પોરેશનના બગીચામાં
ગયા હતા તે દરમિયાન નિકુંજ ત્રિવેદી નામના વ્યક્તિ સાથે વાત થઈ હતી અને તેણે
કુડાસણની રાધે સોસાયટીમાં રહેતો હોવાનું અને સ્વસ્તિકા સ્ટોક માર્કેટ કંપનીનો
બ્રોકર હોવાનું કહીને મિત્રતા કેળવી હતી. તેણે તેના ફોનમાં કસ્ટમરોને થતો નફો
બતાવી આ વૃદ્ધને શેરબજારમાં રોકાણ કરવા માટે વિશ્વાસમાં લીધા હતા. ત્યારબાદ વૃદ્ધ
શેરબજાર સંદર્ભે કઈ જાણતા નહીં હોવાનું કહેતા નિકુંજે તેમને ખાતરી આપી હતી કે તેઓ
ફક્ત ખાતામાં રૃપિયા ટ્રાન્સફર કરે એટલે તે રોકાણના દર મહિને ૨૫ થી ૫૦ હજાર રૃપિયા
જેટલો નફો કમાઈને આપશે. જેથી તેમને વિશ્વાસ આવી જતા ગત જાન્યુઆરી મહિનાથી અત્યાર
સુધીમાં ૧૫ લાખ રૃપિયાનું રોકાણ કર્યું હતું. ત્યારબાદ નફા અંગે વાત કરતા નિકુંજે
ત્રણ ચાર મહિનાનો નફો એક સાથે આપવાની વાત કરી હતી. જોકે ફરીથી તેને ફોન કરતાં ફોન
બંધ આવતો હતો અને રૃપિયા પાછા આપવાની બાહેધરી આપ્યા બાદ પણ હજી સુધી રૃપિયા પરત
નહી મળતા તેની સામે ઇન્ફોસિટી પોલીસ મથકમાં છેતરપિંડીની ફરિયાદ નોંધાવવામાં આવી
છે.
