મુંબઈ : ડોલર ઈન્ડેકસમાં વધારો અને અમેરિકામાં શટડાઉનને ૩૫ દિવસ પસાર થઈ જવા છતાં તેનો અંત આવવાના કોઈ ચિહ્નો નજરે નહીં પડતા ક્રિપ્ટોકરન્સીઝ માર્કેટ પર તેની અસર જોવા મળી હતી અને મુખ્ય ક્રિપ્ટો બિટકોઈન જૂન બાદની નીચી સપાટીની નજીક પહોંચી ગયો હતો. જ્યારે ડોલર ઈન્ડેકસ ઓગસ્ટ બાદ પ્રથમ વખત ૧૦૦ની ઉપરના સ્તરે જોવા મળ્યો હતો.
ડોલર ઈન્ડેકસના ઊંચા સ્તર બિટકોઈન જેવી જોખમી એસેટસ પર દબાણ લાવે છે. અમેરિકામાં શટ ડાઉન હજુ પણ લંબાઈ જવાની શકયતા વ્યકત કરવામાં આવી રહી છે, જેને પરિણામે ક્રિપ્ટોકરન્સીસના રોકાણકારોનું માનસ ખરડાયું છે.
બિટકોઈન જે ૬ ઓકટોબરના ૧,૨૬,૫૦૦ ડોલરની ટોચે પહોંચી ગયો હતો તે એક મહિનાથી પણ ઓછા સમયગાળામાં વીસ ટકા જેટલો ઘટી ગયો છે. વર્તમાન વર્ષના જૂનના અંતિમ સપ્તાહમાં બિટકોઈને ૧,૦૩,૦૦૦ ડોલરની સપાટી દર્શાવી હતી.
છેલ્લા ચોવીસ કલાકમાં બિટકોઈન ઉપરમાં ૧,૦૮,૩૨૮ ડોલર જ્યારે નીચામાં ૧,૦૩,૭૧૪ ડોલર થઈ મોડી સાંજે ૧,૦૪,૫૭૫ ડોલર કવોટ થતો હતો. એથરમનો ભાવ પણ પાંચ ટકાથી વધુ ઘટી ૩૫૨૩ ડોલર આસપાસ કવોટ થતો હતો.
સતત સંસ્થાકીય ઈન્ફલોસ તથા અમેરિકન ફેડરલ રિઝર્વ દ્વારા ટેકારૂપ સંકેતોને પગલે ઓકટોબરમાં બિટકોઈને ઓલ ટાઈમ હાઈ સપાટી દર્શાવી હતી. ઊંચા મથાળે સતત પ્રોફિટ બુકિંગ આવી રહ્યું છે જેને પરિણામે બિટકોઈનમાં હાલમાં રોલર-કોસ્ટર જેવી સ્થિતિ જોવા મળી રહી છે.
ક્રિપ્ટોકરન્સીઝની એકંદર માર્કેટ કેપ પણ ૩ ટકાથી વધુ ઘટી ૩.૪૭ ટ્રિલિયન ડોલર પર આવી ગઈ હતી.
