– અગાઉ 12-24 વર્ષ મુજબનું ઉચ્ચત્તર પગાર અપાતુ હતું
– મહાપાલિકાના કર્મચારીઓને ઉચ્ચત્તર પગાર ધોરણનો લાભ મળશે, સાધારણ સભામાં ઠરાવ મંજૂર થયા તારીખથી અમલવારી કરાશે
ભાવનગર : ગુજરાત સરકારના નાણાં વિભાગનાં ઠરાવથી નાણાં વિભાગના ઠરાવ અન્વયે લાગુ પડતી હાલની ૧૨-૨૪ વર્ષ ઉચ્ચતર પગાર ધોરણની યોજનાના સ્થાને ૧૦-૨૦-૩૦ વર્ષ ઉચ્ચતર પગાર ધોરણ આપવા અંગેની યોજના દાખલ કરવાનું રાજ્ય સરકાર દ્વારા ઠરાવવામાં આવેલ છે.
ભાવનગર મહાનગરપાલિકામાં હાલ ૧૨-૨૪ વર્ષ મુજબનું ઉચ્ચતર પગાર ધોરણ આપવામાં આવે છે. જેને બદલે ભાવનગર મહાનગરપાલિકામાં આ સાથે સામેલ સરકારના નાણાં વિભાગનો ઠરાવ અનુસાર ૧૦-૨૦-૩૦ વર્ષ મુજબનું ઉચ્ચતર પગાર ધોરણ આપવા બાબતનો ઠરાવ ભાવનગર મહાનગરપાલિકાની સાધારણ સમગ્ર સભામાં મંજુર થયા તારીખથી ભાવનગર મહાનગરપાલિકામાં અમલ કરવા માટે ઠરાવ થઈ આવેલ હોવાથી અમલીકરણ આદેશ કરવામાં આવેલ છે તેથી ઠરાવ મુજબ ૧૦-૨૦-૩૦ વર્ષ મુજબનુ ઉચ્ચત્તર પગાર ધોરણ ભાવનગર મહાનગરપાલિકામાં લાગુ કરવા તાજેતરમાં કમિશનરની સૂચના અનુસાર નાયબ કમિશનર (એડમીન)એ હુકમ કર્યો છે.
મહાપાલિકામાં હાલમાં ફરજ બજાવતા તમામ કર્મચારીઓને ઉચ્ચત્તર પગાર ધોરણનો લાભ મળશે તેમ સુત્રોએ જણાવેલ છે. ઉચ્ચત્તર પગાર ધોરણનો હુકમ કરાતા કર્મચારીઓમાં આનંદની લાગણી ફરી વળી છે.
