મુંબઈ : અમેરિકામાં ડોલરમાં મજબૂતાઈ તથા ઊંચા ફુગાવાને પરિણામે વ્યાજ દરમાં ઘટાડાની ઘટી રહેલી શકયતાને પરિણામે સોનાના વૈશ્વિક ભાવમાં સતત ઘટાડો જોવા મળી રહ્યો છે. મંગળવારે વૈશ્વિક સોનાએ ઈન્ટ્રાડેમાં ૪૦૦૦ ડોલરની સપાટી ગુમાવી હતી અને નીચામાં ૩૯૯૮.૦૮ ડોલર ભાવ જોવા મળ્યો હતો.
જો કે નીચા મથાળે ફન્ડ હાઉસોની લેવાલી નીકળતા ભાવ ફરી ઊંચકાયા હતા. સોના પાછળ ચાંદીમાં પણ ભાવ ૫૦ ડોલરની નીચે જોવા મળ્યા હતા. ટ્રમ્પના ટેરિફને કારણે અમેરિકામાં ફુગાવો ઊંચે જઈ રહ્યો હોવાના ચિહ્નો મળી રહ્યા છે માટે ફેડરલ રિઝર્વ ડિસેમ્બરની બેઠકમાં વ્યાજ દરમાં ઘટાડો નહીં કરે તેવી ધારણાં મજબૂત બનતી જાય છે.
અન્ય કિંમતી ધાતુ મક્કમ રહી હતી. િઅમદાવાદ ચાંદી રૂપિયા ૨૦૦૦ જ્યારે સોનુ રૂપિયા ૧૦૦૦ તૂટી ગયુ હતું. સ્થાનિકમાં સોનાચાંદીમાં રેન્જબાઉન્ડ સ્થિતિ જોવા મળી રહી છે. પૂરવઠામાં સ્થિરતાને પગલે ક્રુડ તેલના ભાવમાં ટકેલુ વાતાવરણ જોવા મળ્યું હતું.
ઘરઆંગણે મુંબઈ ઝવેરી બજારમાં ૯૯.૯૦ દસ ગ્રામ સોનાના જીએસટી વગરના ભાવ રૂપિયા ૭૦૦થી વધુ ઘટી રૂપિયા ૧,૨૨,૧૮૦ મુકાતા હતા. ૯૯.૫૦ દસ ગ્રામ સોનાના ભાવ રૂપિયા ૧,૨૧,૬૯૧ બોલાતા હતા. જીએસટી સાથે ભાવ ત્રણ ટકા ઊંચા મુકાતા હતા. ચાંદી .૯૯૯ એક કિલો રૂપિયા ૧૨૦૦ ઘટી જીએસટી વગર રૂપિયા ૧,૫૩,૭૦૬ બોલાતી હતી. જીએસટી સાથે ભાવ ત્રણ ટકા ઊંચા મુકાતા હતા.
અમદાવાદ બજારમાં ૯૯.૯૦ સોનુ પ્રતિ દસ ગ્રામ રૂપિયા ૧૦૦૦ ઘટી રૂપિયા ૧,૨૬,૦૦૦ જ્યારે ૯૯.૫૦ સોનાના દસ ગ્રામ દીઠ ભાવ રૂપિયા ૧,૨૫,૭૦૦ બોલાતા હતા. ચાંદી .૯૯૯ એક કિલોના રૂપિયા ૨૦૦૦ ઘટી રૂપિયા ૧,૫૬,૦૦૦ કવોટ થતા હતા.
વિશ્વ બજારમાં ફન્ડોનું ગોલ્ડ તથા ડોલરમાં સમતુલિત વલણ જોવા મળી રહ્યું છે, જેને પરિણામે સોનામાં ૪૦૦૦ ડોલરની સપાટી જળવાઈ રહી છે. ડોલર ઈન્ડેકસ પણ હાલમાં મક્કમતા જોવા મળી રહી છે. ડોલર ઈન્ડેકસ મજબૂત ટકી રહ્યો છે. સોનુ પ્રતિ ઔંસ ૪૦૪૬ ડોલર કવોટ થતું હતું.
નીચા મથાળે ફન્ડોની લેવાલીએ મોડી સાંજે ભાવ સુધારા તરફી રહ્યા હતા. ઈન્ટ્રાડેમાં સોનુ ૩૯૯૮.૦૮ ડોલર જોવાયું હતું. ચાંદી પ્રતિ ઔંસ ૫૦.૨૮ ડોલર કવોટ થતી હતી. નીચામાં ચાંદી ૪૯.૩૬ ડોલર જોવા મળી હતી. અન્ય કિંમતી ધાતુ પ્લેટિનમ ૧૫૪૫ ડોલર જ્યારે પેલેડિયમ ૧૪૧૨ ડોલર કવોટ થતું હતું.
ક્રુડ ઓઈલના વૈશ્વિક પૂરવઠા ડેટા જાહેર થવા પહેલા ભાવમાં ટકેલુ વાતાવરણ જોવા મળ્યું હતું. નાયમેકસ ડબ્લ્યુટીઆઈ ક્રુડ તેલ પ્રતિ બેરલ ૬૦.૦૮ ડોલર જ્યારે આઈસીઈ બ્રેન્ટ ક્રુડ ઓઈલ પ્રતિ બેરલ મોડી સાંજે ૬૪.૩૩ ડોલર બોલાતું હતું.
