મુંબઈ : ઓકટોબરની સરખામણીએ નવેમ્બરમાં રશિયા ખાતેથી દેશમાં ક્રુડ તેલના પૂરવઠામાં ૫૦ ટકા જેટલો ધરખમ ઘટાડો થઈને તે પ્રતિ દિન ૯૪૮૦૦૦ બેરલ પર આવી ગયો છે જે ઓકટોબરમાં પ્રતિ દિન ૧૮.૯૦ લાખ બેરલ રહ્યું હતું.
રશિયાની બે મોટી ક્રુડ તેલ ઉત્પાદક કંપનીઓ રોઝનેફટ તથા લુકઓઈલ પર અમેરિકાના ૨૧ નવેમ્બરથી લાગુ થઈ રહેલા પ્રતિબંધો પહેલા જ ભારતની ઓઈલ રિફાઈનરીઓએ રશિયા પાસેથી ક્રુડ તેલની ખરીદી ધીમી કરી નાખી છે.
પ્રતિબંધને કારણે ભારત ખાતે રશિયન ક્રુડ તેલની આયાત ઘટી રહી છે અને આવનારા દિવસોમાં ક્રુડ તેલના પૂરવઠેદારોમાં મોટા ફેરબદલ જોવા મળવાની શકયતા છે.
યુક્રેન પર આક્રમણના વિરોધમાં અમેરિકા તથા અન્ય પશ્ચિમી દેશો રશિયા પર વિવિધ પ્રતિબંધો મૂકી રહ્યા છે.
માત્ર ભારત જ નહીં પરંતુ વર્તમાન મહિનામાં ચીન ખાતે રશિયાના ક્રુડ તેલના પૂરવઠામાં ૩૯ ટકા ઘટાડો થઈ પ્રતિ દિન ૭૦૬૦૦૦ બેરલ રહ્યું છે. તુર્કી ખાતે પૂરવઠો ૬૦ ટકા જેટલો ઘટી ગયાનું એક રિસર્ચ પેઢીના રિપોર્ટમાં જણાવાયું હતું.
ગયા નાણાં વર્ષમાં રશિયાના ક્રુડ તેલની ભારત ખાતે થયેલી કુલ ૮.૮૦ કરોડ બેરલ નિકાસમાં ૬૦ ટકા નિકાસ રોઝનેટ તથા લુકઓઈલે કરી હતી.
રશિયા પરના પ્રતિબંધને કારણે ભારતની ક્રુડ તેલની ખરીદી હવે મધ્ય પૂર્વ તથા અમેરિકા તરફ વળવાની શકયતા જોવાઈ રહી છે. વર્તમાન મહિનામાં અમેરિકા ખાતેથી ભારતની ક્રુડ તેલની ખરીદી પ્રતિ દિન ૫૬૬૦૦૦ રહી છે.
લાગુ કરેલા વધારાના ૨૫ ટકા ટેરિફ નાબુદ થાય તે માટે ભારત અમેરિકા પાસેથી વધુ ક્રુડ તેલ ખરીદી રહ્યું છે.
