વડોદરા,૧૯ વર્ષની યુવતીને બે વર્ષથી પટાવી ફોસલાવી પોતાના ઘરે રાખનાર બે અપરિણીત મિત્રો સામે યુવતીની નાનીએ બાપોદ પોલીસ સ્ટેશનમાં ફરિયાદ નોંધાવતા પોલીસે ગુનો દાખલ કરી વધુ તપાસ હાથ ધરી છે.
આજવા રોડ પર રહેતા ૬૯ વર્ષના વૃદ્ધાએ બાપોદ પોલીસ સ્ટેશનમાં ફરિયાદ નોેંધાવી જણાવ્યું છે કે, મારી પૌત્રીએ ધો. ૧૦ સુધીનો અભ્યાસ કર્યો છે. તે હાલમાં અમારી સાથે રહે છે.આજવા રોડની ગોપાલકૃષ્ણ સોસાયટીમાં રહેતા જગદીશભાઇ મિસ્ત્રી મારા પતિના મિત્ર હતા.તેઓના લગ્ન નહીં થયા હોઇ એકલા જ રહેતા હતા. મારી પૌત્રી તેઓને મામા તરીકે બોલાવતી હતી. જગદીશભાઇ કોઇ કામ હોય તો મારી પૌત્રીને તેઓના ઘરે બોલાવતા હતા. છેલ્લા છ મહિનાથી તેઓ મારી પૌત્રીને રોજ તેમના ઘરે બોલાવી આખો દિવસ રાખતા હતા. જેથી, મેં મારી પૌત્રીને તેમના ઘરે જવાની ના પાડતા તે મારી સાથે ઝઘડા કરવા લાગી હતી. તે કહેતી હતી કે, હવે હું જગદીશ મામાના ઘરે જ રહેવાની છું. મારે તમારી સાથે રહેવું નથી. આ અંગે મેં મારી દીકરીને કહેતા દીકરી અને જમાઇ આવ્યા હતા. તેઓને પણ પૌત્રીએ કહ્યું કે, હું જગદીશ મામાની સાથે રહીશ. તમારી સાથે રહેવું નથી. ત્યારબાદ હું મારી દીકરી, જમાઇ અને પૌત્રી જગદીશભાઇના ઘરે મળવા ગયા હતા. મારી પૌત્રી અને જગદીશભાઇએ મળીને અમારી સાથે ઝઘડો કર્યો હતો. થોડા દિવસ પછી હું મારી પૌત્રીને લેવા માટે જગદીશભાઇના ઘરે જતા તેમણે મારી સાથે ઝઘડો કરી જાતિ અપમાનિત શબ્દો કહ્યા હતા. જગદીશભાઇના અન્ય મિત્ર ભાવિક રજનીભાઇ પંડયા પણ અપરિણીત છે. મારી પૌત્રી તેના ઘરે પણ રહેતી હતી. બંનેએ મારી ૧૯ વર્ષની પૌત્રીને માર્ચ – ૨૦૨૩ થી તેમના ઘરે પટાવી ફોસલાવીને રાખી છે અને અમે સમજાવવા જઇએ તો ઝઘડો કરે છે. ઉલ્લેખનીય છે કે, જગદીશભાઇ મિસ્ત્રીની ઉંમર અંદાજે ૬૦ વર્ષની જ્યારે ભાવિક પંડયાની ઉંમર અંદાજે ૩૫ વર્ષની છે.
