રેપીડો એપ પરથી બુક કરેલી કારે જીવ લઇ લીધો
પશ્ચિમ બંગાળથી આવી સોનાના દાગીના ઘડવાની મજુરી કરતાં મિત્રોએ રજા હોય ફરવા જવા માટે ઓનલાઇન કાર મંગાવી હતી
ગાંધીનગર : પશ્ચિમ બંગાળથી આવીને અમદાવાદમાં સોનાના દાગીના ઘડવાની
મજુરી કરતાં મિત્રોએ રજા હોવાથી ફરવા જવા માટે ઓનલાઇન કાર મંગાવી હતી. પરંતુ
રેપીડો એપ પરથી બુક કરેલી આ ગાડીએ એક યુવાનનો જીવ લઇ લીધો હતો. ગાડીના ચાલકે કરાઇ
સાઇફન તરફના રોડ પર ગાડી ભગાવી તેમાં કાબુ ગુમાવીને રોડ સાઇડના બેરિયર સાથે કાર
અથડાવી દેતાં સર્જાયેલા અકસ્માતમાં એક યુવાનનું સ્થળ પર જ મૃત્યુ થયુ હતું.
હાલ અમદાવાદમાં કાલુપુર વિસ્તારમાં ઓરડીમાં રહેતા અને સીજી
રોડ પર વીએન એક્સપર્ટ જ્વેલરીમાં દાગીના ઘડવાની મજુરી કરતાં મુળ પશ્ચિમ બંગાળના
હાવરા જિલ્લાના સૈયદપુર ગામે રહેતા પંકજ લક્ષ્મીકાંત સમંતા નામના યુવાને આ બનાવ
સંબંધે ડભોડા પોલીસ સ્ટેશનમાં ફરિયાદ નોંધાવી છે. તેમાં જણાવ્યા પ્રમાણે એકસ્માતના
બનાવમાં તેના મિત્ર અને સાથે કામ કરતા નાબુદુલહસન નસીમઅલી શેખ નામના યુવાનનું
મૃત્યુ થયુ હતું. ફરિયાદી,
મૃતક અને તેના અન્ય સાથી મિત્રો સુભાષ શંભુનાથ બેરા ત્રણેને રજા હતી. દરમિયાન
નુદબુલહસનનો ફરવા જવા માટે ફોન આવતા ત્રણે સવારે રાયપુરમાં ચકલેશ્વર મહાદેવના
મંદિર પાસે ભેગા થયા હતાં. જ્યાં કરાઇ સઇફન જોવા જવાનું નક્કી કરીને રેપીડો એપ
મારફતે કાર બુક કરાવી હતી. ઓનલાઇન બુક કરેલી ગાડી આવતાં ત્રણે તેમાં બેસી ગયા
હતાં. ગાડીના ચાલકે મેપ લોકેશન પ્રમાણે ગાડી ચલાવી હતી. દરમિયાન કરાઇ સાઇફન તરફના
રોડ પર ચાલકે ગાડી પુરપાટ દોડાવીને લોખંડના બેરિયર સાથે ટકરાવી દીધી હતી.
અકસ્માતમાં ડ્રાઇવરની બાજુની સીટ પર બેઠેલા નાબુદુલ હસનને માથામાં લોખંડની પાઇપ
લાગી જતાં લોગી વહેવા લાગ્યુ હતું. તુરંત ૧૦૮ને કોલ અપાયો હતો. પરંતુ સ્થળ પર
આવેલી ૧૦૮ના તબિબે નાબુદુલહસનને મૃત જાહેર કર્યો હતો.
