આગામી જાન્યુઆરી મહિનામાં બીસીએ ક્રિકેટ સ્ટેડિયમ ખાતે મહિલા પ્રીમિયર લીગ તથા આંતરરાષ્ટ્રીય મેન્સ ઇન્ડિયા-ન્યૂઝિલેન્ડવચ્ચે વનડે મેચ રમાશે ત્યારે વડોદરા – હાલોલ હાઇવે પરથી સ્ટેડિયમ સુધી પહોંચવામાં વાહનચાલકોને સુગમતા માટેનો પ્રશ્ન ચિંતાનો વિષય બન્યો છે. હાલોલ હાઈવે પર વડોદરાના ટોલના કાથી ૮ કિલોમીટરના અંતરે કોટંબી ગામ પાસે આવેલ બીસીએ ક્રિકેટ સ્ટેડિયમ ૩૫ હજાર પ્રેક્ષકોની ક્ષમતા ધરાવે છે. ઇન્ડિયા-વેસ્ટ ઈન્ડિઝ મહિલા વન-ડે સિરીઝની ૩ મેચમાં ૧૨ હજારથી વધુ પ્રેક્ષકો, ડબલ્યુ.પી.એલ.ની ૬ મેચમાં ૨૨ હજારથી વધુ પ્રેક્ષકો અને ઇન્ટરનેશનલ માસ્ટર્સ લીગની ૬ મેચમાં ૨૩હજારથી વધુ પ્રેક્ષકો ઉપસ્થિત રહ્યા હતા.
વર્ષ ૨૦૨૬ની મહિલા પ્રીમિયર લીગની તા. ૧૯ જાન્યુઆરીથી પ ફેબ્રુઆરી વચ્ચે કુલ ૧૧ મેચો અહીં યોજાશે. તા.૩ ફેબ્રુઆરીએ એલિમિનેટર અને તા.૫ ફેબ્રુઆરીએ ફાઇનલ પણ અહીં રમાશે. આ મહત્ત્વપૂર્ણ મેચોને લઈ ક્રિકેટ રસિકોમાં ભારે ઉત્સાહ જોવા મળી રહ્યો છે અને અંદાજે ૩૦ હજારથી વધુ પ્રેક્ષકો ઊમટી પડે તેવી શક્યતા છે..
સ્ટેડિયમ ખાતે ૩૦ મીટરનો આરસીસી રોડ હાલમાં પ્રગતિ હેઠળ છે અને ડબલ્યુ. પી.એલ.પહેલાં તૈયાર થઈ જાય તો મોટી રાહત મળશે. જો કે સ્ટેડિયમ સુધી પહોંચવાના માર્ગની સમસ્યા ક્રિકેટ રસિકોમાં ચિંતાનો વિષય બની છે. અગાઉની મેચો દરમિયાન હાઇવે પર ભારે ટ્રાફિક જામ સર્જાતા અનેક ક્રિકેટ રસિકો મેચમાં મોડા પહોંચ્યા હતા. હાઈવે પરથી પસાર થતા અન્ય વાહનચાલકોને પણ મુશ્કેલીનો સામનો કરવો પડ્યો હતો.
મેચ દરમિયાન હાઇવે પર ટ્રાફિક જામની સમસ્યા
બીસીએ ક્રિકેટ સ્ટેડિયમ ખાતે યોજાતી રાષ્ટ્રીય અને આંતરરાષ્ટ્રીય સ્તરની મેચો દરમિયાન રાજ્યના વિવિધ જિલ્લામાંથી મોટી સંખ્યામાં ક્રિકેટ રસિકો આવતા હોય છે, પરંતુ વાહનચાલકોને હાઈવેથી સ્ટેડિયમના પ્રવેશદ્વાર તરફ સીધો રસ્તો ન મળતા ૨ કિ.મી. આગળ જઈને યુ-ટર્ન લેવો પડે છે. મેચ દરમિયાન મોટી લાઈનમાં વાહનો આ યુ-ટર્ન લેતા હાઇવે પર બે થી પાંચ કિ.મી. સુધીનો ટ્રાફિક જામ સર્જાય છે.
સ્ટેડિયમ પહોંચવા રોંગ સાઈડ દોડતા વાહનો
લાંબા ચકરાવાથી બચવા માટે કેટલાક વાહનચાલકો જોખમ ખેડી રોંગ સાઈડ વાહન હંકારે છે. વડોદરા તરફથી લોકો ભણિયારા ગામના અંડરપાસ થઈને સર્વિસ રોડ પર લગભગ ૩ કિ.મી. સુધી રોંગ સાઈડ વાહનો દોડાવે છે. જ્યારે સ્ટેડિયમથી હાલોલ તરફ જતા વાહનો ભણિયારા અંડરપાસનો ઉપયોગ કરવાના બદલે ૨ કિ.મી. સુધી રોંગ સાઈડ વાહના દોડાવીને સામેથી સાચા ટ્રેક પર આવી રહેલા સેંકડો વાહનચાલકોની સુરક્ષા સામે જોખમ ઊભું કરે છે.
૩૦ મીટર આરસીસી રોડની કામગીરી પૂર્ણતાના આરે
બીસીએ ક્રિકેટ સ્ટેડિયમ સુધી પહોંચવા માટે અગાઉ મછલીપુરા ગામની સામેના ભાગ તરફથી સ્ટેડિયમસુધી જતો ૧ કિ. મી.નો માર્ગ સાંકડો હોવાથી મેચ દરમિયાન ભારે ટ્રાફિક જામસર્જતો હતો. સરકારના નિયમ મુજબ સ્ટેડિયમ માટે ૩૦ મીટર પહોળો માર્ગ ફરજિયાત છે. હાલ હાઈવેથી સ્ટેડિયમતરફનો ૩૦ મીટર આરસીસી રોડની કામગીરી પૂર્ણતાના આરે છે.
પ્રેક્ષકો માટે હંગામી પાર્કિંગની વ્યવસ્થા
સ્ટેડિયમમાં મેમ્બરો સહિતના લોકોની ૫૦૦ જેટલી ગાડીઓ પાર્ક થતા જ પાર્કિંગ ફુલ થઈ જાય છે. પ્રેક્ષકો માટે આઈપીસીએલ સ્ટેડિયમની માફક હંગામી પેઈડપાર્કિંગ વ્યવસ્થા ઊભી કરાય છે. વર્ષ ૨૦૨૪માં ભારત-વેસ્ટઈન્ડિઝ વચ્ચે પ્રથમ ઈન્ટરનેશનલ વિમેન્સ મેચ રમાઈ હતી. તે સમયે મેદાન પાસે ૨.૫૦લાખ ચોરસ ફૂટ જગ્યા પર એક હજાર વાહનો પાર્ક થઈ શકે તેવી વ્યવસ્થા ઊભી કરી હતી.
