અમદાવાદ : ભારતમાં મોંઘવારી કાબૂમાં આવતા રિઝર્વ બેંક ઓફ ઈન્ડિયા દ્વારા વ્યાજદર કાપની જાહેરાત બાદ શેરમાર્કેટમાં સતત બે દિવસથી આવેલ તેજી પર નવા સપ્તાહે બ્રેક વાગી છે. ગુરૂવાર અને શુક્રવારના વધારા બાદ સોમવારે ભારતીય શેરમાર્કેટમાં પોણા ટકા આસપાસનો ઘટાડો જોવા મળ્યો છે. યુએસ ફેડરલ રિઝર્વની આગામી પોલિસી બેઠક પૂર્વેની અનિશ્ચિત્તાઓની સાથે નબળા એશિયાઈ સંકેતો, ભારતીય રૂપિયામાં વધુ નરમાઈ, ક્રૂડ ઓઈલના ભાવ વધારા તથા વિદેશી રોકાણકારોના સતત આઉટફ્લોને કારણે સોમવારે માર્કેટમાં નરમાઈ જોવા મળી હતી.
ઈન્ટ્રાડેમાં બીએસઈ સેન્સેકસ ૮૪,૮૭૫નું તળિયું બતાવીને દિવસના અંતે ૬૦૯ પોઈન્ટ, ૦.૭૧ ટકા નીચે ૮૫,૧૦૨ પર બંધ આવ્યો છે. નિફટી ૫૦ ઈન્ડેકસ પણ ૩૦૦ પોઈન્ટ આસપાસ ઘટીને ૨૫,૮૯૨નું તળિયું બનાવીને દિવસના અંતે ૨૨૫ પોઈન્ટ નીચે ૨૫,૯૬૦ના લેવલે બંધ આવ્યા છે.
સાર્વત્રિક વેચવાલીએ સવસ, રિયલ્ટી સેક્ટરમાં ગાબડા
સેક્ટોરિયલ ઈન્ડાયસિસ પર નજર કરીએ તો આજે સર્વિસ અને રિયલ્ટી સેક્ટરમાં સૌથી વધુ દબાણ હતુ. ૩.૫૦ ટકાના ઘટાડે ટોપ લુઝર સેક્ટર હતા. મેટલ, ફાર્મા, એફએમસીજી અને ઓટો સેક્ટરમાં પણ નોંધપાત્ર વેચાણ જોવા મળ્યું હતું. બેંકિંગ, ઓટો, કેપિટલ ગુડ્સ અને કન્ઝયુમર સેક્ટરમાં ભારે વેચવાલી જોવા મળી હતી. ફક્ત આઇટી ઈન્ડેકસ જ સામાન્ય વધ્યો હતો.
ઈન્ડિગો ટોપ લુઝર, હેવીવેઈટ શેરોમાં પીછેહઠ
ભારતના અને પોતાના ઈતિહાસના સૌથી ખરાબ દોરમાંથી પસાર થઈ રહેલ ઈન્ડિગોની પેરન્ટ કંપની ઈન્ટરગ્લોબ એવિયેશન ૮.૩૨ ટકાના ઐતિહાસિક કડાકા સાથે આજની ટોપ લુઝર રહી. આ સિવાય ભારત ઈલેક્ટ્રિકલ ૫ ટકા, જેએસડબલ્યુ સ્ટીલ ૩.૭૦ ટકા અને ઈટરનલ, નેસ્લે, શ્રીરામ ફાઈનાન્સ, અદાણી એન્ટરપ્રાઇઝ, અદાણી પોર્ટ ૨થી ૩ ટકા તૂટયાં હતા.
રૂપિયાના ઘસારાનો ફાયદો સીધી રીતે નિકાસ આધારિત સેક્ટર અને ખાસ કરીને આઈટી સેક્ટરને થઈ રહ્યો છે. આજના સત્રમાં પણ નિફટીના ૫૦માંથી માત્ર ૪ વધનારા શેરમાં પણ ત્રણ તો આઈટી સેક્ટરના હતા. ટેક મહિન્દ્રા ૧.૩૪ ટકા, એચસીએલ ટેક, રિલાયન્સ અને વિપ્રો પા ટકા વધીને બંધ આવ્યા છે.
ફેડરલ રિઝર્વની બેઠક પર બજારની નજર
૯ ડિસેમ્બરથી શરૂ થનારી યુએસ ફેડરલ રિઝર્વની બે દિવસીય બેઠક પહેલા રોકાણકારો સાવચેતીભર્યું વલણ જાળવી રહ્યા છે. આગામી એફઓએમસી બેઠક, ફુગાવાના આંકડા અને પ્રી-ક્રિસમસ-નવા વર્ષના પૂર્વાંધે પોર્ટફોલિયો એડજસ્ટમેન્ટ પહેલાં રોકાણકારો સાવધાની વર્તી રહ્યાં છે.
ઓસ્ટ્રેલિયા, બ્રાઝિલ, કેનેડા અને સ્વિર્ટ્લૅન્ડની સેન્ટ્રલ બેંકોની નીતિ-નિર્ધારણ બેઠક પણ આ અઠવાડિયે મળવાની છે. જોકે ફેડ સિવાય અન્ય કોઈ દેશમાં વ્યાજદરમાં નોંધપાત્ર ફેરફારની કોઈ અપેક્ષા નથી. રૂપિયાનો સતત ઘસારો વિદેશી સંસ્થાગત રોકાણકારોને બજારમાં એકતરફી વેચાણ કરવા માટે મજબૂર કરી રહી છે. બીજું મુખ્ય પરિબળ જાપાની બોન્ડ યિલ્ડમાં વધારો થયો છે, જે યેન કેરી ટ્રેડના સેટલમેન્ટના બીજા તબક્કાને ઉત્તેજિત કરી શકે છે.
ક્રૂડમાં નરમાઈ છતા ઈક્વિટીમાં મંદી
વૈશ્વિક સ્તરે ક્રૂડ ઓઇલના ભાવ પ્રતિ બેરલ ૬૪ ડોલરથી નીચે ઉતર્યા છે. વૈશ્વિક માંગ અંગે ચિંતામાં વધારો થતા ઓઈલ માર્કેટમાં મંદી છે છતા ઈક્વિટીમાં નરમાઈ છે. ડોલર ઈન્ડેકસમાં પણ સામાન્ય ઘટાડા છતા ડોલર સામે રૂપિયો આજે વધુ ૯ પૈસા ઘટીને ૯૦.૦૭ પર બંધ આવ્યો છે. આક્રમક કોલ રાઇટિંગ અને ડેરિવેટિવ્ઝમાં લોંગ પોઝિશન ઘટતા ઇન્ટ્રાડે વેચવાલીને વેગ મળ્યો હતો.
RBIનો લાભ લાંબાગાળે, અત્યારે બજાર સંકેતહીન
નિષ્ણાતોના મતે રિઝર્વ બેંક ઓફ ઈન્ડિયા દ્વારા તાજેતરમાં કરવામાં આવેલ વ્યાજદરમાં ઘટાડો મધ્યમ ગાળાના આર્થિક વિકાસને ટેકો આપી શકે છે, પરંતુ બજાર પર સીધી અસર ન થતી હોવાથી માર્કેટ ખેલાડીઓ સાવધ બન્યાં છે. રોકાણકારો અને ટ્રેડરો નવી મોટી લોંગ પોઝીશન લેવાનું ટાળી રહ્યા છે અને વૈશ્વિક સ્તરેથી ફેડ દ્વારા કે ભારત-અમેરિકા વચ્ચે વેપાર સંધિ મામલે સ્પષ્ટ સંકેતો બહાર આવે ત્યાં સુધી વેઈટ એન્ડ વોચની સ્થિતિ અપનાવતા જોવા મળી રહ્યાં છે.
રોકાણકારોના રૂ. ૭ લાખ કરોડનું ધોવાણ
દલાલ સ્ટ્રીટમાં સોમવારના સત્રમાં આવેલા ઘટાડાના કારણે રોકાણકારોની ૭ લાખ કરોડની સંપત્તિ સાફ થઈ છે. બીએસઈનું માર્કેટ કેપિટલાઈઝેશન શુક્રવારના ૪૭૧ લાખ કરોડના સ્થાને સોમવારે ૪૬૪ લાખ કરોડ થયું છે. બીએસઈ પર ટ્રેડ થયેલા કુલ ૪૪૮૫ શેરમાંથી ૮૪૩ શેર વધીને તો ૩૪૬૦ શેર ઘટીને બંધ આવ્યા છે. એકપણ શેરમાં આજે અપર સર્કિટ નહોતી જોવા મળી.
