Surat Corporation : સુરતમાં ખાનગી સ્કૂલોની જેમ સરકારી સ્કૂલમાં શિક્ષણનું સ્તર સુધારવા સાથે શિક્ષકો અને વિદ્યાર્થીઓને સ્માર્ટ બનાવવા પાલિકા પ્રયાસ કરી રહી છે. આ પ્રયાસના ભાગરૂપે ખાનગી સ્કૂલમાં જેમ ઈન્ટર એક્ટિવ (સ્માર્ટ બોર્ડ) પર શિક્ષણ અપાય રહ્યું છે. હાલમાં સમિતિની શાળામાં ઈન્ટર એક્ટિવ બોર્ડ માટે કોર્પોરેટરની ગ્રાન્ટનો ઉપયોગ કરવાનો નિર્ણય કરવામાં આવ્યો હતો. પરંતુ પાલિકાની બજેટની સ્થાયી સમિતિની સભામાં આ નિર્ણયને રદ્દ કરવામા આવ્યો છે અને સર્વ શિક્ષા અભિયાનની ગ્રાન્ટમાંથી બોર્ડ ખરીદવાનો નિર્ણય કરાયો છે.
સુરત પાલિકા સંચાલિત નગર પ્રાથમિક શિક્ષણ સમિતિમાં હાઈટેક શિક્ષણ માટે ઈન્ટર એક્ટિવ બોર્ડ મુકવામાં આવી રહ્યા છે. જોકે, આ બોર્ડ માટે પાલિકાના કોર્પોરેટરની ગ્રાન્ટનો ઉપયોગ થાય તેવો નિર્ણય કરાયો હતો. આ નિર્ણય કર્યા બાદ શાસક પક્ષના દંડક સહિત કેટલાક કોર્પોરેટરોએ ઈન્ટર એક્ટિવ બોર્ડ માટે ગ્રાન્ટ પણ ફાળવી દીધી હતી. જોકે, આ નિર્ણય બાદ કેટલાક સેટિંગ બાજ કોર્પોરેટરોએ સ્માર્ટ બોર્ડ સપ્લાય કરનારા કોન્ટ્રાક્ટરો સાથે સેટીંગ કરી દીધું હોવાની ફરિયાદ બહાર આવી હતી. આ ગંભીર ફરિયાદ બાદ સ્થાયી સમિતિએ નિર્ણય ફેરવી તોળ્યો છે. પરંતુ કારણ સર્વ શિક્ષા અભિયાનની ગ્રાન્ટમાથી બોર્ડ ખરીદવાનું જાહેર કર્યું છે.
સ્થાયી અધ્યક્ષ રાજન પટેલે બજેટ બેઠક ની ચર્ચા દરમિયાન કહ્યું હતું કે, સ્માર્ટ બોર્ડની ખરીદી સર્વ શિક્ષા અભિયાનની ગ્રાન્ટમાંથી થઇ શકે તેમ છે. તેના માટે કોર્પોરેટરોની ગ્રાન્ટનો ઉપયોગ યોગ્ય નથી પરંતુ સ્કૂલમાં બાળકો અભ્યાસ કરે છે તેઓને સ્વચ્છ પાણી મળે તે માટે આર.ઓ. પ્લાન્ટ લગાવવાનો નિર્ણય કર્યો છે તેથી કોર્પોરેટરો તેમાં ગ્રાન્ટ ફાળવી શકે છે.
