Gujarat Crime : ગુજરાતના વડોદરામાં એક સનસનીખેજ હત્યા કેસનો ખુલાસો થયો છે. આ ઘટનામાં મોટી બહેને જ પોતાના પ્રેમી સાથે મળીને નાની બહેનને હત્યા કરી નાખી છે. કળયુગી બહેને જીવન વીમા પોલિસીના 40 લાખ રૂપિયા મેળવવા માટે બહેનને મોતને ઘાટ ઉતારી હોવાનું પોલીસે જણાવ્યું છે. વડોદરા રૂરલ પોલીસે આ કેસમાં મૃતકની મોટી બહેન અને તેના પ્રેમીની ધરપકડ કરી છે.
ગળુ દબાવીને હત્યા કરી
મળેલા અહેવાલ મુજબ, વડોદરાના અંકોડિયા ગામ પાસેથી ત્રણ દિવસ પહેલાં 36 વર્ષીય અજીજા દીવાનનો મૃતદેહ મળી આવ્યો હતો. પોસ્ટમોર્ટમ રિપોર્ટમાં ગળું દબાવીને હત્યા કરવામાં આવી હોવાનું સામે આવ્યું હતું. પોલીસે આસપાસના CCTV ફૂટેજની તપાસ શરૂ કરી હતી, જેના આધારે આ કેસનો ભેદ ઉકેલાયો.
બહેને પ્રેમી સાથે મળી બહેનને જ મોતને ઘાટ ઉતારી દીધી
વડોદરા રૂરલ પોલીસ અધિક્ષક સુશીલ અગ્રવાલે જણાવ્યું કે, સીસીટીવી ફૂટેજમાં એક વ્યક્તિ અજીજાને તેના ઘરથી થોડે દૂરથી બાઈક પર લિફ્ટ આપતો દેખાયો હતો. પોલીસે આ વ્યક્તિની ઓળખ અજીજાની બહેન ફિરોઝા દીવાનના પ્રેમી રમીઝ શેખ તરીકે કરી હતી. પૂછપરછ દરમિયાન ફૂડ ડિલિવરીનું કામ કરતા રમીઝે અજીજાની દુપટ્ટાથી હત્યા કરવાની કબૂલાત કરી હતી.
આ પણ વાંચો : અમદાવાદ: મિલકત હડપવા જન્મ- મરણના ખોટા સર્ટિફિકેટ-કોર્ટના ઓર્ડર બનાવ્યા, 4 આરોપી ઝડપાયા
પૈસાની જરૂરિયાત અને હત્યાનું કાવતરું
જ્યારે પોલીસે કડકાઈ સાથે પૂછપરછ કરી ત્યારે ખુલાસો થયો છે કે, રમીઝ મૃતકની મોટી બહેન ફિરોઝાને પ્રેમ કરતો હતો અને ફિરોઝાને પૈસાની જરૂર હતી. અજીજા તેના પતિ સાથેના વિવાદને કારણે છેલ્લા છ મહિનાથી પિતાના ઘરે રહેતી હતી.
અજીજાના નામે પોલિસી લઈ નોમિની બની, પછી હત્યા કરી નાખી
ફિરોઝાએ નાની બહેન અજીજાના નામે 40 લાખ રૂપિયાની જીવન વીમા પોલિસી ખરીદી હતી અને પોતે તેમાં નોમિની બની હતી. તેણે 28 નવેમ્બરે જ પોલિસીનો પ્રથમ પ્રીમિયમ ભર્યો હતો. મુખ્ય આરોપી ફિરોઝાએ પોતાની જ બહેનની હત્યા કરવાનો આખો પ્લાન ઘડી કાઢ્યો હતે. આ માટે તેણે પ્રેમી રમીઝને હત્યા કરવા માટે રાજી કર્યો હતો અને તેને સાત લાખ રૂપિયા આપવાનું વચન આપ્યું હતું.
બંને હત્યારાની ધરપકડ
મંગળવારે રાત્રે ફિરોઝાએ અજીજાને કહ્યું કે, તેણીને સરકારી યોજનાનો લાભ જોઈએ તો શ્રમ કાર્ડ બનાવવા માટે જાય. આ માટે ફિરોઝાએ અજીજાને કાર્ડ બનાવવામાં મદદ કરનાર રમીઝ સાથે મોકલી હતી. ત્યારબાદ રમીઝ અજીજાને બાઈક પર પાદરા લઈ ગયો હતો અને પછી અંકોડિયાના એક સૂમસામ વિસ્તારમાં લઈ જઈ દુપટ્ટા વડે ગળું દબાવી હત્યા કરી દીધી હતી. પોલીસે ફિરોઝા દીવાન અને તેના પ્રેમી રમીઝ શેખની ધરપકડ કરીને વધુ કાર્યવાહી હાથ ધરી છે.
આ પણ વાંચો : ‘જોઈએ છે એક વાઘણ’: રતનમહાલમાં વસી ગયેલા વાઘ માટે ગુજરાત સરકારે કેન્દ્ર પાસે કરી માંગ
