Surat Corporation : સુરત મહાનગરપાલિકાના ટાઉન પ્લાનિંગ અને શહેરી વિકાસ વિભાગ વચ્ચે સંકલનનો અભાવ દુર થતા પાલિકાની પેઈડ એફ.એસ.આઈ.ની આવક સતત વધી રહી છે. 2024-25ના બજેટમાં 950 કરોડની આવકના મૂળ ટાર્ગેટ સામે રિવાઇઝ બજેટમાં 1100 કરોડની આવકનો અંદાજ રજૂ કરાયો છે. જેની સામે હાલમાં 1035 કરોડની આવક થઈ ગઈ છે. આ અંગે સ્થાયી સમિતિની બેઠકમાં વિભાગની કામગીરી તાળીઓથી વધાવવામાં આવી હતી.
સુરત પાલિકાના બજેટની ચર્ચા દરમિયાન સુરત પાલિકાના ટાઉન પ્લાનિંગ વિભાગ અને શહેરી વિકાસ વિભાગ દ્વારા કામગીરીનો ચિતાર રજૂ કરવામાં આવ્યો હતો. તેમા જણાવવામાં આવ્યું હતું કે, ટાઉન પ્લાનિંગ અને સેન્ટ્રલ ટીડીઓ વિભાગનો હવાલો એક જ અધિકારીને સોંપવાના મનપા કમિ.ના નિર્ણયને પગલે બંને ચાવીરૂપ વિભાગો વચ્ચે સંકલનના અભાવે પ્રશ્ન દૂર થયો છે. જેની સીધી અસર પાલિકાના વિકાસ અને પેઈડ એફ.એસ.આઈ. પર જોવા મળી રહી છે.
વિભાગીય વડા મનીષ ડોકટરે પોતાના વિભાગની કામગીરી સ્થાયી સમિતિ સમક્ષ રજુ કરી હતી જેમાં પેઇડ એફએસઆઇની આવકનો વર્તમાન નાણાકીય વર્ષનો લક્ષ્યાંક 1100 કરોડ રાખવામાં આવ્યો છે. જયારે આગામી નાણાકીય વર્ષમાં 1000 કરોડનો લક્ષ્યાંક રાખવામાં આવ્યો છે. અત્રે ઉલ્લેખનીય છે કે, વર્ષ 2024-25ના બજેટમાં 950 કરોડની આવકના મૂળ ટાર્ગેટ સામે રિવાઇઝ બજેટમાં 1100 કરોડની આવકનો અંદાજ રજૂ કરાયો છે. અત્યાર સુધી 1035 કરોડની આવક પાલિકાની તિજોરીમા જમા થઈ ગઈ છે. આ આંકડા જોઈને સ્થાયી સમિતિએ મ્યુનિ. કમિશનર શાલિની અગ્રવાલ તથા બન્ને વિભાગને તાળીઓથી વધાવી લીધા હતા.
