– ખાસ સઘન સુધારણાની મુસદ્દા મતદાર યાદી પ્રસિદ્ધ કરાઈ
– એએસડીની યાદીમાં 2,28,956 મતદારો : 18 વર્ષ પૂરા કરનાર યુવાઓ ફોર્મ નં.૬ ભરી આખરી મતદાર યાદીમાં નામ દાખલ કરાવી શકશે
ભાવનગર : ભાવનગર જિલ્લામાં મતદાર યાદીની ખાસ સઘન સુધારણા ઝુંબેશ (સ્પેશિયલ ઈન્ટેન્સિવ રિવિઝન)ની કામગીરી પૂર્ણ થતાં આજે શુક્રવારે મુસદ્દા યાદી પ્રસિદ્ધ કરવામાં આવી હતી.
જિલ્લા કલેક્ટર ડો.મનીષ કુમાર બંસલે માહિતી આપતા જણાવ્યું હતું કે, જિલ્લાની સાત વિધાનસભામાં ૯,૫૮,૯૨૪ પુરૂષ, ૯,૦૭,૯૭૭ અને અન્ય ૩૬ મળી કુલ૧૮,૬૬,૯૩૭ મતદારો નોંધાયેલા છે. તે પૈકીના ૧૬,૩૭,૯૮૧ મતદારો પાસેથી ગણગતરી ફોર્મ મળતા તમામનું ડિજિટલાઈઝેશન થઈ ચુક્યું છે. બીએલઓએ ડોર-ટુ ડોર સરવે કરી અવસાન પામેલા, સ્થળાંતરિત, બે જગ્યાએ નોંધાયેલા મતદારોની ઓળખ કરી હતી. જેમાં અવસાન પામેલા મતદારોની સંખ્યા ૬૬,૦૮૬, કાયમી ધોરણે સ્થળાંતર કરી ચૂકેદા મતદારોની સંખ્યા ૧,૨૪,૮૫૦, અનટ્રેસેબલ મતદારોની સંખ્યા ૨૨,૦૦૪, ઓલરેડી ઈનરોલ્ડ મતદારોની સંખ્યા ૧૪,૨૬૨ અને અન્ય મતદારોની સંખ્યા ૧,૭૫૪ રહી છે. સેલ્ફ મેપિંગ ૬,૩૦,૭૫૪ (૩૩.૯૪ ટકા), પ્રોજેની મેપિંગ ૯,૧૩,૫૦૬ (૪૮.૯૩ ટકા) અને નો મેપિંગ ૯૩,૭૨૧ (૫.૦૨ ટકા) થયું હતું. એએસડીની યાદીમાં ૨,૨૮,૯૫૬ (૧૨.૨૬ ટકા) મતદારો છે.
ખાસ સઘન સુધારણાની મુસદ્દા મતદાર યાદી પ્રસિદ્ધ થયા બાદ હવે તા.૧૦-૨ સુધી નોટિસ તબક્કો રહેશે. જેમાં યાદીમાં નામ ન હોય તેવા મતદારો નામ દાખલ કરાવવા માટે જરૂરી ૧૩ ડોક્યુમેન્ટ પૈકીના આધારને સાથે રાખી ફોર્મ નં.૬ ભરીને ઓનલાઈન/ઓફલાઈન અરજી કરી શકશે. જો મુસદ્દા મતદાર યાદીમાં દર્શાવેલી વિગતોમાં કોઈ ભૂલ હો તો ડેકલેરેશન સાથે ફોર્મ નં.૮ ભરીને જરૂરી આધાર-પુરાવાના દસ્તાવેજ સામેલ રાખી ઓનલાઈન/ઓફલાઈન અરજી કરી શકશે. વધુમાં તા.૧-૧-૨૦૨૬ની લાયતકાતે ૧૮ વર્ષ પૂરા કરનાર યુવાઓ ફોર્મ નં.૬ ભરી તા.૧૭-૨-૨૬ના રોજ પ્રસિદ્ધ થનાર આખરી મતદાર યાદીમાં પોતાનું નામ દાખલ કરાવી શકે છે.
જિલ્લાની 7 વિધાનસભામાં 291 મતદાર મથકો ઉમેરાયા
મતદાર મથકોનું રેશનલાઈઝેશન/રિ-એરેન્જમેન્ટ તબક્કામાં એક બૂથ પર ૧૨૦૦થી વધુ મતદારો ન રહે તે રીતે મતદારોની વહેંચણી કરવામાં આવી છે. જેના કારણે સાત વિધાન સભા મતવિસ્તારમાં અગાઉ જે ૧૮૫૨ મતદાન કેન્દ્ર હતા. તેમાં નવા ૨૯૧ મતદાન મથકનો ઉમેરો થતાં સંખ્યા ૨૧૪૩ થઈ છે. બીએલઓની સંખ્યા હાલ ૧૮૫૨ છે, તેમાં મતદાન મથકોના પુનઃગઠન બાદ ૨૯૧ના વધારા સાથે ૨૧૪૩ બીએલઓ થશે. બીએલઓ સુપરવાઈઝરની સંખ્યા પણ ૩૦ વધીને ૨૩૨ થશે.
રાજકીય પક્ષોને મુસદ્દા મતદાર યાદી સુપ્રત કરાઈ
એસઆઈઆરની કામગીરી દરમિયાન રાજકીય પક્ષો સાથે અનેક વખત મિટીંગ યોજી કાર્યક્રમની માહિતીથી અવગત કરાયા હતા. આજે મુસદ્દા મતદાર યાદી જાહેર થતાં જિલ્લા ચૂંટણી અધિકારી ડો.મનીષ કુમાર બંસલલે તમામ માન્ય રાજકીય પક્ષોના પ્રતિનિધિઓની સાથે બેઠક યોજી મતદાર યાદીની એક ફોટાવાળી પ્રિન્ટેડ અને એક ફોટા વગરની સોફ્ટ કોપી સુપ્રત કરી હતી. જે મતદારોને ગણતરી ફોર્મ નથી મળ્યા તેમની યાદી પણ સોંપાઈ હતી. રાજકીય પક્ષોના પ્રતિનિધિઓએ યાદીની ચકાસણી કરી જો કોઈ વાંધા-દાવા હોય તો તા.૧૮-૨ સુધીમાં નિયત પ્રક્રિયા અનુસરીને મતદારોને સહાયરૂપ બનવા અપીલ કરાઈ હતી.
