અમદાવાદ : નવેમ્બરમાં વાર્ષિક દ્રષ્ટિએ ક્રૂડ ઓઇલ આયાત વોલ્યુમમાં ૧૧ ટકાનો વધારો થયો છે, જ્યારે આયાત બિલ સ્થિર જ રહ્યું છે. પેટ્રોલિયમ પ્લાનિંગ એન્ડ એનાલિસિસ સેલ (પીપીએસી)ના ડેટા અનુસાર નવેમ્બરમાં દેશનું તેલ આયાત બિલ ૯.૯ અબજ ડોલર રહ્યું છે, જે એક વર્ષ અગાઉના સમયની સાપેક્ષે સ્થિર જ છે.
ભારતે મહિના દરમિયાન ૨.૧૧ કરોડ ટન ક્રૂડ ઓઇલ આયાત કર્યું હતું, જે ગત વર્ષના સમાન સમયગાળામાં આયાત કરાયેલા ૧.૮૯ કરોડ ટન કરતા નોંધપાત્ર રીતે વધારે છે.
આંતરરાષ્ટ્રીય બજારમાં વધુ પડતા સપ્લાયના ડરના કારણે ૨૦૨૫માં ક્રૂડ ઓઇલના ભાવ નીચા રહ્યા છે. આ કારણોસર જ તેલ ખરીદીમાં વધારા છતાં ભારત માટે આયાત બિલ ઓછું થયું છે.
નવેમ્બર ૨૦૨૫ દરમિયાન ભારતીય ક્રૂડ ઓઇલ બાસ્કેટની કિંમત સરેરાશ ૬૪.૩૧ ડોલર પ્રતિ બેરલ હતી, જે ગયા વર્ષે ૭૩.૦૨ ડોલર પ્રતિ બેરલ હતી. એપ્રિલ-નવેમ્બર સમયગાળા દરમિયાન દેશનું ક્રૂડ ઓઇલ આયાત બિલ લગભગ ૧૨ ટકા ઘટીને ૮૦.૯ અબજ ડોલર થયું. ડિસેમ્બરમાં આયાત બિલની આ સ્થિતિ ભારત માટે વધુ સુધરી શકે છે. બેન્ચમાર્ક બ્રેન્ટ ૬૦ ડોલર પ્રતિ બેરલથી પણ નીચે ગગડીને પાંચ વર્ષના તળિયે પહોંચ્યું છે.
ભારતનું લિક્વિફાઇડ નેચરલ ગેસ આયાત બિલ પણ નવેમ્બરમાં ૧.૨ અબજ ડોલર પર સ્થિર રહ્યું, જ્યારે આયાત વોલ્યુમમાં ૫ ટકાનો વધારો થયો છે. ભારતે મહિનામાં ૨૮૪.૪ કરોડ મેટ્રિક સ્ટાન્ડર્ડ ક્યુબિક મીટર એલએનજીની આયાત કરી, જે ગત વર્ષના સમાન સમયગાળામાં ૨૭૧.૨ હતું.
