Vadodara : વડોદરા કારેલીબાગ વિસ્તારમાં આવેલા દીપીકા ગાર્ડન પાસે સવાર સાંજ ખાનગી ફોરવ્હીલમાં વેપાર ધંધો કરનારા-જ્યુસના લારી ધારકોના આડેધડ પાર્કિંગ તથા બગીચામાં વોકિંગ કરનારાના પણ વાહનોના ગમે તેમ પાર્કિંગથી વિસ્તારની વિવિધ સોસાયટીઓ અને એપાર્ટમેન્ટના રહીશો ભારે મુશ્કેલીમાં મુકાયા છે. આ સમસ્યા અંગે સ્થાનિક કોર્પોરેટરો સમક્ષ અને વોર્ડ કચેરીએ વારંવાર રજૂઆતો છતાં સમસ્યા યથાવત રહેતા સ્થાનિકોમાં ભારે રોષ વ્યાપ્યો છે.
ઉલ્લેખનીય છે કે શહેરના ઇલેક્શન વોર્ડ નંબર સાતમાં સંગમ ચાર રસ્તા પાસે દીપિકા ગાર્ડન આવેલો છે આ ગાર્ડનમાં સવાર સાંજ અસંખ્ય લોકો વોકિંગ કરવા પોતપોતાના વાહનો લઈને આવી આડેધડ વાહનો પાર્ક કરીને બગીચામાં જાય છે. બીજી બાજુ બગીચાના રોડ રસ્તાની બંને બાજુએ ખાનગી વાહનોમાં ફરસાણ, ખાખરા અને કપડાનો વેપાર ધંધો કરનારા અન્ય વાહનચાલકોને મુશ્કેલીરૂપ થાય એવી રીતે વેપાર ધંધો કરવા વાહનો રાખતા હોય છે. પરિણામે સ્થાનિક રહીશોને ભારે આ બાકી ભોગવી પડે છે. આ વિસ્તારમાં દીપિકા સોસાયટી 1-2, અક્ષતા સોસાયટી બદરી કેદાર એપાર્ટમેન્ટ સુંદરવન સોસાયટીના સ્થાનિક રહીશોએ પાલિકા તંત્ર સમક્ષ અને વોર્ડ કચેરીએ તથા સ્થાનિક કોર્પોરેટરોને વારંવાર રજૂઆતો કરવા છતાં પણ સમસ્યાનો કોઈ નિકાલ થતો નથી. ટ્રાફિક અને સ્થાનિકોને નડતરરૂપ આડેજળ થતાં વાહન પાર્કિંગ અને લારીઓવાળાના દબાણો દૂર કરવામાં તંત્રને કોઈ રસ નહીં હોવાની શક્યતા નકારી શકાતી નથી પરિણામે સ્થાનિકોમાં ભારે આક્રોશ ફેલાયો છે.
પાલિકાની દબાણ શાખા દ્વારા શહેરના વિવિધ વિસ્તારના ગેરકાયદે અને નડતરરૂપ દબાણો દૂર કરાય છે પરંતુ દીપિકા ગાર્ડન પાસે વહેલી સવારે અને સમી સાંજથી મોડી રાત સુધી થતા દબાણો ખસેડવામાં તંત્ર દ્વારા કોઈ સમસ્યાનો હલ લાવવામાં આવતો નહીં હોવાનો સ્થાનિકોએ આક્ષેપ કર્યો છે. દીપીકા ગાર્ડન આસપાસ વોર્ડ નંબર ૭ના આ વિસ્તારના સ્થાનિક રહીશોને સવારે વેપાર ધંધે અને નોકરીએ પોતાના વાહનો લઈને આ વિસ્તારમાંથી નીકળવું મુશ્કેલ બને છે આવી જ રીતે સમી સાંજે વેપાર ધંધે અને નોકરીએથી પરત વાહનો લઈને આવતા હેરાન પરેશાન થઈ જવું પડે છે. આ વિસ્તારમાં ફ્રુટ જ્યુસની લારીઓ, ફોર વ્હીલર વાહનોમાં ફરસાણ- કપડાનો વેપાર ધંધો કરનારાના આડેધડ પાર્કિંગની નડતરરૂપ સમસ્યાનો વહેલી તકે તકે નિકાલ લાવવામાં આવે તેવી સ્થાનિક રહીશોની ઉગ્ર માંગ છે.
