– ભેંસ જોવા આવી સોદો નક્કી કર્યો હતો
– પિતા-પુત્રએ 18 ભેંસ ગામના બે વેપારીઓ પાસેથી ખરીદી હતી
ભાવનગર : ગઢડા તાલુકાના હોળાયા ગામે પિતા-પુત્રએ બે માલધારી પાસેથી ભેંસ ખરીદી હતી અને રૂપિયાની માંગણી કરતા વાયદાઓ કરી રૂપિયા નહીં આપી પિતા-પુત્રએ રૂ.૨૦.૫૬ લાખની છેતરપિંડી આચરી હતી.
ગઢડા તાલુકાના હોળાયા ગામે આવેલ ખોડીયાર નગરમાં રહેતા અને ભેંસની લે-વેચ કરી ગુજરાન ચલાવતા જીગ્નેશભાઈ જીલુભાઈ વાઘેલાના ઘરે પચીસ દિવસ પહેલા રજાક હાજીભાઈ સૈયદ તથા તેમનો દિકરો આદીલ રજાકભાઇ સૈયદ (રહે.ગઢડા) ભેસો જોવા માટે આવ્યા હતા અને જીગ્નેશભાઈ પાસેથી કુલ ૯ ભેંસ રૂ.૧૨,૧૦,૦૦૦ ખરીદી હતી. તેમજ શાંતીભાઈ કેશુભાઇ વાઘેલા (રહે. ગઢડા) પાસેથી કુલ ૯ ભેંસ રૂ.૮,૪૬,૦૦૦ ખરીદી હતી અને જીગ્નેશભાઈ અને શાંતિભાઈ પાસેથી કુલ ૧૮ ભેંસ મળી કુલ રૂ.૨૦,૫૬,૦૦૦ની ભેંસો મેળવી લીધી હતી અને રૂપિયા લેવાના બાકી રાખ્યા હતા. જે બાદ બન્નેએ રૂપિયાની ઉઘરાણી કરી ત્યારે વાયદાઓ કરવા લાગ્યા હતા. દરમિયાનમાં જીગ્નેશભાઈ પિતા-પુત્ર ના ઘરે તપાસ કરવા ગયા ત્યારે સામાન લઈને બન્ને ગુમ થઈ ગયા હતા અને ફોન પણ બંધ કરી દીધો હતો. આમ, શાંતિભાઈ અને જીગ્નેશભાઈ સાથે રૂ.૨૦.૫૬ લાખની છેતરપિંડી આચરી હતી. આ બનાવ સંદર્ભે જીગ્નેશભાઈએ પિતા-પુત્ર વિરૂધ્ધ ગઢડા પોલીસ માથામાં ફરિયાદ નોંધાવતા પોલીસે વધુ તપાસ હાથ ધરી છે.
પિક અપ ગાડીમાં ભેંસ ભરી પિતા પુત્ર પોબારા ગણી ગયા
પિતા-પુત્ર બંને પાસે ભેંસ જોઈ સોદા નક્કી કર્યાં બાદ વાડીએ અને ઘરે આવી પિક અપ ગાડીમાં ભેંસ ભરી પિતા પુત્ર પોબારા ગણી ગયા હતા.
