વૈશ્વિક સોનું વધુ વેગથી વધી ૪૫૦૦ ડોલર નજીક પહોંચી ગયું
અમદાવાદ,મુંબઈ : અમેરિકા તથા વેનેઝુએલા વચ્ચે તણાવ વધતાં તથા ક્રૂડતેલના ભાવ ઉછળતાં વૈશ્વિક સોનામાં તેજી માટે બજારને નવું કારણ મળ્યું હતું. આ ઉપરાંત ટેરીફના કારણે અનિશ્વિત વાતાવરણમાં સેફ હેવન લેવાલી રૂપે ફંડો સોના-ચાંદી તરફ વળતા વૈશ્વિક બજોરોમાં સોના-ચાંદી નવી ટોચ તરફ આગળ વધી રહ્યા છે. વિશ્વ બજારમાં સોનાના ભાવ વધુ ઉછળી ઔંશના ઉંચામાં ૪૫૦૦ ડોલર નજીક પહોંચી ગયા છે.આ અહેવાલો પાછળ ભારતીય સોના-ચાંદી બજારમાં તોફાની તેજી યથાવત રહી હતી.
આ અહેવાલો પાછળ દિલ્હી બુલિયન બજારમાં ચાંદી રૂ.૨૭૫૦ ઉછળી રૂ.૨,૧૭.૨૫૦ પહોંચી હતી.જ્યારે સોનું રૂ.૨૬૫૦ વધી રૂ.૧,૪૦,૮૫૦ની વિક્રમી સપાટીએ પહોંચી ગયું હતુ. અમદાવાદ સોના -ચાંદી બજારમાં આજે સોનાના ભાવવ ૧૦ ગ્રામના વધુ રૂ.૨૫૦૦ ઉછળી ૯૯૫ના ભાવ રૂ.૧૪૦૨૦૦ તથા ૯૯૯ના ભાવ રૂ.૧૪૦૫૦૦ બોલાઈ ગયા હતા. સોનાના ભાવ બે દિવસમાં ૪૦૦૦ ઉછળ્યા હતા.
દરમિયાન, અમદાવાદ ચાંદીના ભાવ આજે કિલોના વધુ રૂ.૭૦૦૦ વધી રૂ.૨૧૨૦૦૦ના નવા ઉંચા મથાળાને આંબી ગયા હતા. ચાંદીના ભાવ બે દિવસમાં ૧૨ હજાર ઉછળતાં બજારના ખેલાડીઓ સ્તબ્ધ બની ગયા હતા.
મુંબઈ ઝવેરી બજારમાં આજે સોના-ચાંદીના ભાવમાં રેકોર્ડ તેજી વણથંભી વેગથી આગળ વધતાં કિંમતી ધાતુઓ ઉછળી નવા ઉંચા શિખરે પહોંચી ગઈ હતી. સોના પાછળ વૈશ્વિક ચાંદીના ભાવ પણ વધુ વધી ઉંચામાં ઔંશના ૭૦ ડોલર નજીક જતા રહ્યા હતા.
વિશ્વ બજાર વધુ ઉછળતાં ઘરઆંગણે ઈમ્પોર્ટ કોસ્ટ વધુ ઉંચી જતાં દેશના ઝવેરી બજારોમાં આજે તોફાની તેજી આગળ વધી હતી.
સોનાના ભાવ આ વર્ષે ૭૦ ટકા વધ્યા છે તથા આવતા વર્ષે ભાપ વધુ વધી ઔંશના ૫૦૦૦ ડોલરને આંબી જવાની ગણતરી જાણકારો બતાવી રહ્યા હતા. સોનામાં આ વર્ષે જોવા મળેલી તેજી છેલ્લે ૧૯૭૯ના વર્ષમાં દેખાઈ હતી.
દરમિયાન, અમેરિકામાં આવતા વર્ષે વ્યાજના દરમાં વધુ ઘટાડો થવાની શક્યતા વધતાં તથા ડોલરનો વૈશ્વિક ઈન્ડેક્સ ઘટતાં વૈશ્વિક સોનામાં ફંડોની બાઈંગ ચાલુ રહી હતી.
મુંબઈ બુલીયન બજારમાં સોનાના ભાવ જીએસટી વગર ૯૯૫ના રૂ.૧૩૩૪૩૪ વાળા આજે રૂ.૧૩૫૭૩૭ રહ્યા હતા જ્યારે ૯૯૯ના ભાવ રૂ.૧૩૩૯૭૦ વાળા રૂ.૧૩૬૨૮૩ રહ્યા હતા જ્યારે મુંબઈ ચાંદીના ભાવ જીએસટી વગર રૂ.૨૦૭૭૨૫ વાળા રૂ.૨૧૧૦૦૦ રહ્યા હતા.
વિશ્વ બજારમાં અન્ય કિંમતી ધાતુઓ પણ ઉછળતી જોવા મળી હતી. પ્લેટીનમના ભાવ વદી ઔંશના ૨૧૯૫ થઈ ૨૧૭૫થી ૨૧૭૬ ડોલર રહ્યા હતા જ્યારે પેલેડીયમના ભાવ વધી ૧૮૪૯ થઈ ૧૮૦૦થી ૧૮૦૧ ડોલર રહ્યા હતા. કોપરના ભાવ વધુ ૧.૧૧ ટકા વધ્યા હતા તથા વૈશ્વિક ભાવ વધી ટનના ૧૨ હજાર ડોલર ઉપર જતાં નવો રેકોર્ડ સર્જાયો હતો. ક્રૂડતેલ પણ વધ્યું હતું. બ્રેન્ટ ક્રૂડના ભાવ વધી બેરલના ઉંચામાં ૬૨.૨૭ થઈ ૬૨.૧૮ ડોલર તથા યુએસ ક્રૂડના ભાવ વધી ૫૮.૧૭ થઈ ૫૮.૦૯ ડોલર રહ્યા હતા. પેલેડીયમ વધી ત્રણ વર્ષની ટોટે પહાંચ્યું હતું.
