દારૂ, બિયર, કાર સહિત રૂા.7.13 લાખનો મુદ્દામાલ જપ્ત
પોલીસને જોઇ બુટલેગરોએ કાર ભગાવી, પોલીસે પીછો કરી એકને ઝડપી પાડયો, અન્ય નાસી છૂટયો
સુરેન્દ્રનગર: માલવણ હાઇવે પર ધ્રાંગધ્રા તાલુકા પોલીસે માલવણ તરફથી આવતી એક કારમાંથી બે લાખથી વધુનો દારૂ-બિયરનો જથ્થો ઝડપી પાડયો હતો. પોલીસને જોઇ બુટલેગરે કાર ભગાવી હતી પરંતુ પોલીસે પીછો કરી એકને ઝડપી પાડયો હતો જ્યારે એક ભાગવામાં સફળ રહ્યો હતો. પોલીસે દારૂ, બિયર, કાર સહિત રૂા.૭.૧૩ લાખનો મુદ્દામાલ જપ્ત કરી બે શખ્સ સામે ગુનો નોંધી તપાસ હાથ ધરી છે.
માલવણ-કચ્છ નેશનલ હાઈવે પર માલવણ તરફથી એક કારમાં ઈંગ્લીશ દારૂ ભરી હળવદ-મોરબી તરફ જતી હોવાની બાતમીના આધારે ધ્રાંગધ્રા પોલીસે વોચ ગોઠવી હતી. જેમાં બાતમીવાળી કારને પોલીસે રોકવાનો પ્રયાસ કરતા કાર ચાલકે કારને પુરપાટ ઝડપે ભગાવી હતી. જોકે, પોલીસે ફલકુ નદીના બોર્ડ પાસે રોડ પર આડસ રાખી રસ્તો બ્લોક કરતા કાર ફલકુ નદીના પુલ પાસે ઉભી રહી ગઇ હતી. કારમાંથી બે શખ્સો ભાગવા જતા પોલીસ ટીમે પીછો કરી એક શખ્સ જેઠારામ ખેતારામ જાખડ (રહે.બાડમેર, રાજસ્થાન)ને ઝડપી લીધો હતો જ્યારે બીજો શખસ નાસી છુટવામાં સફળ રહ્યો હતો. કારની તલાસી લેતા તેમાંથી બીયરના ૧૦૫૬ નંગ ટીન (કિં.રૂા. ૧,૩૨,૦૦૦), ઈંગ્લીશ દારૂની ૧૧૦ નંગ બોટલ (કિં.રૂા. ૭૬,૯૨૦) મળી આવી હતી. પોલીસે બિયર, દારૂ, મોબાઈલ (કિં.રૂા.૫,૦૦૦), કાર (કિં.રૂા.૫ લાખ) સહિત કુલ રૂા. ૭,૧૩,૯૨૦નો મુદ્દામાલ કબજે કરી ઝડપાયેલા શખ્સ અને ફરાર શખ્સ વિરૂધ્ધ ધ્રાંગધ્રા તાલુકા પોલીસ મથકે પ્રોહિબીશન એક્ટ હેઠળ ગુનો નોંધી કાર્યવાહી હાથ ધરી છે.
