વડોદરાઃ એમ.એસ.યુનિવર્સિટીની સૌથી મોટી કોમર્સ ફેકલ્ટીમાં છેલ્લા બે વર્ષથી પરીક્ષાઓ નિયમિત લેવાની શરુઆત થઈ છે પરંતુ ૪૫ દિવસની સમય મર્યાદામાં પરિણામ જાહેર કરવામાં સત્તાધીશોને સફળતા મળી રહી નથી.
ફેકલ્ટીમાં સેમેસ્ટર ૩ અને સેમેસ્ટર પાંચ એટલે કે એસવાય અને ટીવાયની એક્સટર્નલ પરીક્ષા લેવાયે ૪૫ દિવસનો સમય થઈ ગયો છે પણ હજી સુધી ૧૦૦૦૦ જેટલા વિદ્યાર્થીઓના પરિણામ જાહેર થયા નથી.સૂત્રોનું કહેવું છે કે, એક્સટર્નલ પરીક્ષાના પરિણામમાં ઈન્ટર્નલ પરીક્ષાના માર્ક પણ ઉમેરવાના હોય છે પણ ફેકલ્ટીમાંથી આ માર્કસ પરીક્ષા વિભાગમાં મોકલવામાં થયેલા વિલંબના કારણે પરિણામ તૈયાર કરવાની કામગીરી ઘોંચમાં પડી છે.ઉત્તરવહીઓ લગભગ તપાસાઈ ગઈ છે પણ ટેબ્યુલેશનની કામગીરી અટકી હોવાથી માર્કશીટો તૈયાર થઈ રહી નથી.
આ પરિસ્થિતિને જોતા પરિણામ જાહેર થવામાં બીજા બે સપ્તાહનો સમય લાગી શકે છે.આ મુદ્દે આજે ઓલ ગુજરાત સ્ટુડન્ટ યુનિયન દ્વારા યુનિવર્સિટી હેડ ઓફિસ ખાતે વિદ્યાર્થીઓનો મોરચો લઈ જવામાં આવ્યો હતો અને રજૂઆત કરવામાં આવી હતી.
અધ્યાપકો- કર્મચારીઓને હજી એપ્રિલ- મે મહિનાની પરીક્ષાનું મહેનતાણું ચૂકવાયું નથી
મળતી વિગતો પ્રમાણે કોમર્સ ફેકલ્ટીમાં સુપરવિઝન, ઉત્તરવહીઓ તપાસવાની અને ટેબ્યુલેશન જેવી પરીક્ષાની કામગીરી કરતા અધ્યાપકો અને કર્મચારીઓને એપ્રિલ- મે મહિનાની પરીક્ષાનું લગભગ ૨૫ લાખ રુપિયાનું મહેનતાણું હજી ચૂકવાયું નથી.પરીક્ષામાં લગભગ ૪૦૦ કરતા વધારે અધ્યાપકો અને કર્મચારીઓએ ફરજ બજાવી હતી.ડેટા એન્ટ્રી કરવામાં સર્જાયેલી સમસ્યાના કારણે મહેતનાણું ચૂકવવામાં મુશ્કેલી પડી હોવાનું કહેવાઈ રહ્યું છે.જોકે હવે તો અધ્યાપકોએ નવેમ્બર- ડિસેમ્બરની પરીક્ષાની કામગીરી પણ શરુ કરી દીધી છે.
