વડોદરાઃ ઇલોરાપાર્ક વિસ્તારની સ્ટેટ બેન્ક ઓફ ઇન્ડિયાની શાખામાં બોગસ દસ્તાવેજો મૂકી છ લોન ધારકો અને મળતીયાઓ દ્વારા રૃ.૧.૯૭ કરોડની લોન લેવાના કૌભાંડમાં ક્રાઇમ બ્રાન્ચે એક મહિલાની ધરપકડ કરી છે.
ઇલોરાપાર્ક ખાતે આવેલી સ્ટેટ બેન્ક ઓફ ઇન્ડિયા(રીટલ એસેટ્સ સેન્ટ્રલ પ્રોસેસિંગ સેન્ટર)માંે વર્ષ-૨૦૨૧-૨૨માં છ લોન ધારકોએ બેન્કના એજન્ટ અને અન્ય વચેટિયાઓ મારફતે બોગસ દસ્તાવેજો બનાવી ફાઇલો મૂકીને કુલ રૃ.૧.૯૭ કરોડની હોમલોન લીધી હોવાનું કૌભાંડ બહાર આવતાં ચાર મહિના પહેલાં ગોરવા પોલીસ સ્ટેશનમાં ફરિયાદ નોંધાઇ હતી.
આ બનાવમાં લોન માગનારાઓએ નોકરીની કંપની બોગસ દર્શાવી હતી.મળતીયાઓએ તેમને કંપનીના બોગસ એપાઇન્ટમેન્ટ લેટર,આઇકાર્ડ, પગાર સ્લીપ,ઇન્કમટેક્સના ફોર્મ-૧૬, બેન્ક સ્ટેટમેન્ટ જેવા તમામ બોગસ દસ્તાવેજો તૈયાર કરી આપ્યા હતા.જેથી કુલ ૧૬ જણા સામે ગુનો નોંધાયો હતો.
ઉપરોક્ત બનાવમાં રૃ.૧૩.૫૦ લાખની લોન માટે ફાઇલ મૂકનાર શંપા મિહિરભાઇ ચેટર્જી (હરિઓમ નગર સોસાયટી,બીલ રોડ, વડોદરા અને સ્ટાર રેસિડેન્સી વાસણા) હાલમાં ન્યુ અલકાપુરીના આકાશ એપાર્ટમેન્ટ ખાતે હોવાની માહિતી મળતાં ક્રાઇમ બ્રાન્ચની ટીમે મહિલા પોલીસ સાથે પહોંચી જઇ મહિલાની ધરપકડ કરી હતી.
જેવી લોન તેવો હોદ્દો,કોઇ પ્રોજેક્ટ મેનેજર તો કોઇ સુપરવાઇઝર બન્યા
એસબીઆઇની હોમ લોન લેવા માટે કમિશન એજન્ટોએ લોનની રકમ મુજબ નોકરીના બોગસ સ્થળ,હોદ્દા અને અન્ય દસ્તાવેજો બનાવી આપ્યા હતા.જેમાં એજન્ટોને કુલ રૃ.૧.૭૦ લાખનું કમિશન મળ્યું હતું.આ એજન્ટો અને તેમના મળતીયાઓએ લોનની રકમ મુજબ બોગસ હોદ્દા દર્શાવતા ડોક્યુમેન્ટ બનાવ્યા હતા.જેમાં કોઇને સ્ટોર સુપરવાઇઝર,તો કોઇને લેબ આસિસ્ટન્ટ અને પ્રોજેક્ટ મેનેજર બનાવવામાં આવ્યા હતા,અને તે મુજબના નોકરી,પગારના તમામ દસ્તાવેજો તૈયાર કર્યા હતા.
