વૈશ્વિક સોનું ઉછળી ૪૬૦૦ ડોલરને આંબી ગયું
મુંબઈ : મુંબઈ ઝવેરી બજારમાં આજે સોના-ચાંદીના ભાવમાં તોફાની તેજી આગળ વધતાં નવા રેકોર્ડ ઊંચા ભાવ જોવા મળ્યા હતા. વિશ્વ બજારમાં કિંમતી ધાતુઓના ભાવ વધુ ઉછળતાં ઘરઆંગણે ઈમ્પોર્ટ કોસ્ટમાં વધુ વૃદ્ધી થઈ છે અને તેના પગલે દેશના ઝવેરી બજારોમાં ઉતરાણ પૂર્વે વિક્રમી તેજીનો પતંગ વધુ ઉંચે ચગતો જોવા મળ્યો હતો. વિશ્વ બજારમાં આજે સોનાના ભાવ ઔંસના ૪૫૦૯થી ૪૫૧૦ ડોલરવાળા વધુ ઉછળી ઉંચામાં ભાવ ૪૬૦૦ ડોલરની નવી ઉંચી સપાટીને આંબી ગયા પછી ભાવ ૪૫૮૨થી ૪૫૮૩ ડોલર રહ્યા હતા.
વિશ્વ બજાર પાછળ ઘરઆંગણે અમદાવાદ ઝવેરી બજારમાં સોનાના ભાવ ૧૦ ગ્રામના વધુ રૂ.૧૭૦૦ ઉછળી ૯૯૫ના ભાવ રૂ.૧૪૪૨૦૦ તથા ૯૯૯ના ભાવ રૂ.૧૪૪૫૦૦ બોલાતાં નવો ઈતિહાસ સર્જાયો હતો. દરમિયાન, અમદાવાદ ચાંદીના ભાવ કિલોના વધુ રૂ.૭૦૦૦ ઉછળી રૂ.૨૫૫૦૦૦ બોલાતાં નવો રેકોર્ડ થયો હતો. વિશ્વ બજારમાં સોના પાછળ ચાંદીના ભાવ ઔંસના ૭૯.૮૫થી ૭૯.૮૮ વાળા ઉછળી ઉંચામાં ભાવ ૮૪.૬૦ થઈ ૮૩.૮૬થી ૮૩.૮૭ ડોલર રહ્યા હતા.
વિશ્વ બજારના સૂત્રોના જણાવ્યા મુજબ અમેરિકામાં ફેડરલ રિઝર્વના અધ્યક્ષ તથા ટ્રમ્પ વચ્ચે તણાવ વધતાં ડોલરનો વૈશ્વિક ઈન્ડેક્સ ગબડયો હતો અને તેના પગલે વૈશ્વિક સોનામાં ફંડોની લેવાલી વધતી જોવા મળી હતી. આ ઉપરાંત વેનેઝુએલા પછી હવે અમેરિકાના પ્રમુખે ઈરાન તરફ તથા ગ્રીનલેન્ડ અને કોલમ્બીયા તરફ લાલ આંખ કરતાં વૈશ્વિક રાજકીય અરાજકતાની ભીતિના પગલે પણ સોનામાં સેફ હેવન સ્વરૂપની માગ વધ્યાના વાવડ મળ્યા હતા.
દરમિયાન, મુંબઈ બુલિયન બજારમાં આજે સોનાના ભાવ વધી જીએસટી વગગર ૯૯૫ના રૂ.૧૩૯૮૮૭ તથા ૯૯૯ના રૂ.૧૪૦૪૪૯ રહ્યા હતા જ્યારે મુંબઈ ચાંદીના ભાવ આજે રૂ.૯૦૦૦ ઉછળી જીએસટી વગર ભાવ રૂ.૨૫૭૨૮૩ થઈ ૨૫૬૭૭૬ રહ્યા હતા. મુંબઈ સોના-ચાંદીમાં જીએસટી સાથેના ભાવ આ ભાવથી ૩ ટકા ઉંચા રહ્યા હતા. વિશ્વ બજારમાં અન્ય કિંમતી ધાતુઓ પણ ઉછળતી જોવા મળી હતી. પ્લેટીનમના ભાવ ઔંસના વધી ૨૩૮૪ થઈ ૨૩૫૬થી ૨૩૫૭ ડોલર રહ્યા હતા.
જ્યારે પેલેડીયમના ભાવ ઉછળી ઉંચામાં ભાવ ૧૯૧૧ થઈ ૧૮૭૦થી ૧૮૭૧ ડોલર રહ્યા હતા. વૈશ્વિક કોપરના ભાવ આજે વધુ ૨.૧૦થી ૨.૧૫ ટકા ઉછળ્યા હતા.
દરમિયાન, વિશ્વ બજારમાં ક્રૂડ તેલના ભાવ વધ્યા પછી ફરી ઘટાડા પર રહ્યા હતા. બ્રેન્ટક્રૂડના ભાવ બેરલના ૬૩.૩૪ વાળા ઉંચામાં ભાવ ૬૪ ડોલર થયા પછી નીચામાં ભાવ ૬૨.૭૬ થઈ ૬૨.૮૬ ડોલર રહ્યા હતા. યુએસ ક્રૂડના ભાવ ઉંચામાં ૫૯.૮૦ તથા નીચામાં ભાવ ૫૮.૪૫ થઈ ૫૮.૫૮ ડોલર રહ્યા હતા. ઉછાળે નવી માગ ધીમી પડી હતી.
સોના-ચાંદીના વાયદા ઓલટાઇમ હાઈ
અગ્રણી કોમોડિટી ડેરિવેટિવ્ઝ એક્સચેન્જ પર કીમતી ધાતુઓમાં સોના-ચાંદીના વાયદાઓમાં રૂ. ૩૯૦૦૮.૨૬ કરોડનાં કામકાજ થયાં હતાં. સોનું ફેબ્આરી વાયદો ૧૦ ગ્રામદીઠ રૂ.૧૩૯૬૦૦ના ભાવે ખૂલી, ઉપરમાં રૂ.૧૪૧૬૪૩ અને નીચામાં રૂ.૧૩૯૬૦૦ના સ્તરને સ્પર્શી, રૂ.૧૩૮૮૧૯ના આગલા બંધ સામે રૂ.૨૬૯૧ વધી રૂ.૧૪૧૫૧૦ના સ્તરે પહોંચ્યો હતો. ગોલ્ડ-ગિની જાન્યુઆરી વાયદો ૮ ગ્રામદીઠ રૂ.૧૩૭૦ વધી રૂ.૧૧૪૩૨૬ના સ્તરે પહોંચ્યો હતો. ગોલ્ડ-પેટલ જાન્યુઆરી વાયદો ૧ ગ્રામદીઠ રૂ.૧૮૩ વધી રૂ.૧૪૨૯૬ના ભાવે ટ્રેડ થઈ રહ્યો હતો.
ચાંદીના વાયદાઓમાં ચાંદી માર્ચ વાયદો કિલોદીઠ રૂ.૨૬૨૮૩૪ના ભાવે ખૂલી, ઉપરમાં રૂ.૨૬૫૪૮૧ અને નીચામાં રૂ.૨૬૦૭૧૧ના મથાળે અથડાઈ, રૂ.૨૫૨૭૨૫ના આગલા બંધ સામે રૂ.૧૧૭૨૮ વધી રૂ.૨૬૪૪૫૩ના સ્તરે પહોંચ્યો હતો. કિલોદીઠ ચાંદી-મિની ફેબ્આરી વાયદો રૂ.૧૧૪૭૯ વધી રૂ.૨૬૬૩૭૨ના ભાવે ટ્રેડ થઈ રહ્યો હતો. ચાંદી-માઇક્રો ફેબ્આરી વાયદો રૂ.૧૧૪૭૧ વધી રૂ.૨૬૬૩૯૧ના ભાવે ટ્રેડ થઈ રહ્યો હતો.
