Surat : સુરત મહાનગરપાલિકાએ હોર્ડિગ્સનો નિયમ તો બનાવ્યો પણ અમલ ન થતાં ગેરકાયદે બેનરની ભરમાળ જોવા મળી રહી છે. સુરતમાં ગેરકાયદે બેનર લગાવનારા પર કોઈ શિક્ષાત્મક કાર્યવાહી ન થતાં શહેર બેનરોનું જંગલ બની રહ્યું છે. વેકેશન પહેલા સુરતમાં શૈક્ષણિક, ધાર્મિક અને ધંધાદારી બેનરની માયાજાળ શહેરની સુંદરતામાં ઘટાડો થઈ રહ્યો છે.
સુરતમાં વેકેશન પહેલા ધાર્મિક અને ધંધાદારી ગેરકાયદેસર બેનર અને હોર્ડિંગનું દુષણ વધી રહ્યું છે. સુરત શહેરના સર્કલ, રસ્તા અને લાઈટ પોલ સાથે પાલિકાની અનેક જગ્યાએ ગેરકાયદેસર રીતે બેનર અને હોર્ડિંગ્સ લગાવવામાં આવી રહ્યા છે. સૌથી વધુ ગેરકાયદે બેનર અને હોર્ડિંગ્સ શૈક્ષણિક ધંધાદારી જાહેરાત અને ધાર્મિક કાર્યક્રમોના છે. ગેરકાયદે જાહેરાત લગાવનારા સામે કોઈ શિક્ષાત્મક કાર્યવાહી થતી ન હોવાથી ગેરકાયદે જાહેરાતની સંખ્યા દિવસેને દિવસે વધી રહી છે.
સુરત મહાનગરપાલિકા વિસ્તારમાં હાલમાં સર્કલ અને ડિવાઈડર પર મોટા પ્રમાણમાં બેનર જોવા મળે છે. ગેરકાયદે લાગેલા બેનરના કારણે પાલિકાની જાહેરાત આવકને ફટકો પડી રહ્યો છે. સુરતમાં હાલ વિદ્યાર્થીઓને નીતિના પાઠ ભણાવતી શૈક્ષણિક સંસ્થા સાથે લોકોને ધર્મનું જ્ઞાન આપતા ધાર્મિક હોર્ડિંગ્સ અને બેનર મોટી સંખ્યામાં ગેરકાયેદસર હોવાનું બહાર આવ્યું છે કેટલીક વખત પાલિકા હોર્ડિગ્સ અને બેનર દુર કરી રહી છે પરંતુ બેનર-હોર્ડિગ્સ ગેરકાયદે લગાવનાર સંસ્થા સામે હજુ સુધી કોઈ શિક્ષાત્મક પગલાં ભરવાની પહેલ કરવાની હિંમત પાલિકા તંત્ર કરી શક્યું નથી.રાજકીય અને વહીવટી તંત્રની ઈચ્છા શક્તિ હોય તો આવા લોકો સામે શિક્ષાત્મક કાર્યવાહી કરવા સાથે આકરો દંડ કરવામાં આવે તો આ પ્રકારનું દુષણ દુર થાય તેવી પૂરી શક્યતા છે.
