Vadodara : વડોદરામાં ઉનાળાની શરૂઆત સાથે જ પાણીનો કાળો કકળાટ શરૂ થઈ ગયો છે. અનેક વિસ્તારોમાં પાણી ઓછું મળતું હોવાથી કોર્પોરેશન સામે આક્રોશ જોવા મળી રહ્યો છે. ત્યારે સમા વિસ્તારમાં આજે પાણીના મુદ્દે ભારે તંગદીલી સર્જાઈ છે.
કોર્પોરેશનના વોર્ડ નંબર 2 માં છેલ્લા કેટલાક સમયથી પાણીના મુદ્દે લોકોએ રજૂઆત કરી હોવા છતાં કોઈ પરિણામ નહીં મળતા આજે (મંગળવારે) સમા વિસ્તારમાં મહિલાઓ મોટી સંખ્યામાં ભેગા થઈને મોરચો કાઢી રહી હતી.
જોકે તેમના દેખાવોને પોલીસની પરવાનગી મળી ન હોવાથી પોલીસે મહિલાઓને મોરચો કાઢવા દીધો ન હતો. જે દરમિયાન પોલીસ અને મહિલાઓ વચ્ચે ઘર્ષણ તેમજ ઝપાઝપી થઈ હતી.
આ પણ વાંચો: આપણે પતિ અને પત્ની જેવા સંબંધો રાખવા પડશે તેમ કહી ભુવાના પુત્રનું મહિલા પર વારંવાર દુષ્કર્મ
એક તબક્કે મહિલા પોલીસની મદદ લઈ પોલીસ દ્વારા વિરોધ કરનારાઓને ટીંગાટોળી કરીને પોલીસ વાનમાં લઈ જવાયા હતા. જેને પગલે લોકોએ અમારો વાંક શું છે… કોર્પારેશન પાણી ના આપી શકે અને જો હુકમી અમારા ઉપર કરી રહી છે… એમ કહી ઉગ્ર રોષ વ્યક્ત કર્યો હતો. પોલીસે 8 થી 10 જણાને વાનમાં બેસાડી ડીટેન કર્યા હતા. જે દરમિયાન મહિલાઓનો બીજો પણ મોરચો આવી જતા વાતાવરણ વધુ તંગ બન્યું હતું. તો પોલીસે વધુ કાફલો મંગાવ્યો હતો.
