Vadodara : મિત્રતા રાખવા માટે દબાણ કરી કોલેજ જતી વિદ્યાર્થીનીનો અવારનવાર પીછો કરવો તેમજ તેના પરિવારજનો અને મિત્રોને બીભત્સ મેસેજો મોકલી પજવણી કરવાના મામલે કપુરાઈ પોલીસે વિદ્યાર્થી સામે કાયદેસરની કાર્યવાહી હાથ ધરી છે.
મૂળ રાજકોટની અને હાલ બાપોદ વિસ્તારમાં રહેતી 23 વર્ષની વિદ્યાર્થીની ખાનગી યુનિવર્સિટીમાં અભ્યાસ કરે છે. તેણીએ નોંધાવેલી ફરિયાદ મુજબ, વર્ષ 2024ના નવરાત્રી દરમિયાન યુનિવર્સિટીમાં અભ્યાસ કરતા વમશીરામ પાંડુગા (રહે. હૈદરાબાદ) સાથે તેની ઓળખ થઈ હતી અને મિત્રતા બંધાઈ હતી. જોકે, થોડા સમય બાદ અનુકૂળ ન લાગતા વિદ્યાર્થીનીએ મિત્રતા રાખવાની ના પાડી હતી. તે છતાં આરોપીએ મિત્રતા માટે દબાણ ચાલુ રાખતાં વિદ્યાર્થીનીએ તેનો મોબાઇલ નંબર બ્લોક કરી દીધો હતો.
ફરિયાદ અનુસાર, ત્યારબાદ આરોપી વિદ્યાર્થી કોલેજ આવતાં-જતાં સમયે વિદ્યાર્થીનીનો અવારનવાર પીછો કરતો હતો. પીછો ન કરવા સમજાવ્યા છતાં તે માન્યો ન હતો. વધુમાં, ગત તા.18 ડિસેમ્બરના રોજ રાત્રે આરોપી વિદ્યાર્થીની સાથે વાતચીત કરવા તેના ઘરે પહોંચી મિત્રતા માટે ફરી દબાણ કર્યું હતું. છેલ્લા એક અઠવાડિયાથી આરોપીએ વિદ્યાર્થીનીના કુટુંબીજનો તથા મિત્રોને બંને વચ્ચેના ચેટિંગના સ્ક્રીનશોટ તેમજ બીભત્સ મેસેજો મોકલી પજવણી કરવાનું શરૂ કર્યું હતું.
ઉક્ત ફરિયાદના આધારે પોલીસે આરોપી સામે બીએનએસ કલમ 78 મુજબ ગુનો નોંધી આગળની કાર્યવાહી હાથ ધરી છે.
