– હાલ ટેન્કરથી પાણી પહોંચાડવાની હૈયાધારણા
– ત્રાસદ રોડ પર આવેલી ઠાકોરવાસમાં એક મહિનાથી પાણી વિતરણ નહીં કરાતા હાલાકી
બગોદરા : ધોળકા શહેરના ત્રાસદ રોડ પર આવેલી ક્રિશ્ના પાર્ક સોસાયટીના ઠાકોરવાસમાં છેલ્લા એક મહિનાથી પાણીનો પુરવઠો ખોરવાઈ જતાં સ્થાનિક રહીશો ભારે હાલાકીનો સામનો કરી રહ્યા હતા. પીવાના પાણી માટે વલખાં મારતા રહીશોએ આજે નગરપાલિકા કચેરી ખાતે ચીફ ઓફિસરને ઉગ્ર રજૂઆત કરી હતી.
સ્થાનિકોના જણાવ્યા અનુસાર, છેલ્લા એક મહિનાથી આ વિસ્તારમાં પાણી આપવામાં આવતું ન હોવાથી ગૃહિણીઓ અને રહીશો ત્રાહિમામ પોકારી ગયા હતા. રજૂઆત દરમિયાન ચીફ ઓફિસર દ્વારા જણાવવામાં આવ્યું હતું કે, પાણીની મુખ્ય લાઈનમાં ભંગાણ પડવાને કારણે પુરવઠો બંધ હતો. આગામી ત્રણ દિવસમાં લાઈન રિપેર કરી પાણી વિતરણ પૂર્વવત કરી દેવામાં આવશે.
જોકે, ત્યાં સુધી વૈકલ્પિક વ્યવસ્થા તરીકે સ્થાનિકોએ ટેન્કરની માંગણી કરી હતી. જેના પગલે ચીફ ઓફિસરે પાણી શાખાને સૂચના આપી હતી કે જ્યાં સુધી લાઈન રીપેર ન થાય ત્યાં સુધી વિસ્તારમાં દિવસમાં બે વાર ટેન્કરથી પાણી પહોંચાડવામાં આવે.
