ઓછા વ્યાજે સોલાર માટે લોન આપવાના બહાને
સિબિલ સ્કોર જોવાના બહાને ગઠિયાઓએ મોબાઈલ લઈ ગુગલ પેથી પૈસા ટ્રાન્સફર કરી લીધા, પોલીસે ગુનો નોંધ્યો
નડિયાદ: માતર તાલુકાના બરોડા પાટિયાના ખેડૂતને સોલર પેનલ માટે સસ્તી લોન અપાવવાની લાલચ આપી બે અજાણ્યા ગઠિયાઓએ સિબિલ સ્કોર જોવાના બહાને મોબાઈલ લઈ ખેડૂતના ખાતામાંથી રૂ.૮૦,૦૦૦ સેરવી લીધા હોવાની ઘટના સામે આવી છે. આ બનાવ અંગે ભોગ બનનાર ખેડૂતે લીંબાસી પોલીસ સ્ટેશનમાં ફરિયાદ નોંધાવતા પોલીસે ગુનો નોંધી કાયદેસર કાર્યવાહી હાથ ધરી હતી.
માતર તાલુકાના બરોડા પાટીયા પાસે રહેતા કાનજીભાઈ વિરાભાઈ ભરવાડ ખેતી અને પશુપાલનનો વ્યવસાય કરે છે. તેઓ પોતાના ઘરે સોલર પેનલ લગાડવા માંગતા હતા. આ માટે તેઓ બેંકના સંપર્કમાં હતા. આ દરમિયાન તા. ૧૩-૦૨-૨૦૨૬ના રોજ કાનજીભાઈ માતર કેડીસીસી બેંકમાં જવા તેમના સંબંધીની રાહ જોઈને બરોડા પાટિયા પર આવેલી ભત્રીજાની દુકાને બેઠાં હતા. ત્યારે એક અજાણ્યો શખ્સ આવ્યો હતો અને સોલાર માટે લોન લેવાની વાતચીત સાંભળી કાનજીભાઈને જણાવેલું કે, અમારો માણસ તમારા ગામમાં સોલારનું કામ કરે છે અમે તમને ઓછા વ્યાજે લોન અપાવીશું, હું મારા માણસને બોલાવું છું તેમ કહી ફોન કરતા એક્ટિવા લઈને અન્ય એક શખ્સ આવી પહોંચ્યો હતો.
આ બંને શખ્સોએ બેંક ઓફ બરોડા ખેડામાં નોકરી કરતા હોવાનું જણાવી કાનજીભાઈને વિશ્વાસમાં લઇ ઓછા વ્યાજે સોલર લોન અપાવી દેશે તેમ કહી લોન મંજૂર કરાવવા માટે ‘સીબીલ સ્કોર’ ચેક કરવો પડશે, તેમ કહી કાનજીભાઈનો મોબાઈલ બે વખત માંગ્યો હતો. મોબાઈલ સીબીલ સ્કોર ચેક કરવાના બહાને લઇ ગઠિયાઓએ કાનજીભાઈના ફોનમાં રહેલા ગુગલ પે મારફતે ‘ચામુંડા સ્વીટ માર્ટ’ના નામે કુલ રૂ. ૮૦,૦૦૦ ટ્રાન્સફર કરી લીધા હતા. ગઠિયાઓએ મોબાઈલ પરત આપતા કાનજીભાઈને મોબાઈલમાં પૈસા કપાયાનો મેસેજ આવતા શંકા ગઈ હતી. તેમણે તુરંત જ ગઠિયાઓને રોકવા પ્રયાસ કર્યોે હતો. પરંતુ આ બંને ગઠિયાઓ એક્ટિવા પર બેસી પુરઝડપે હંકારી ફરાર થઈ ગયા હતા. કાનજીભાઈ અને તેમના ભત્રીજાઓએ આરોપીઓનો પીછો કરવાનો પ્રયાસ કર્યોે હતો, પરંતુ બંને શખ્સો નાસી છૂટયા હતા. આ બનાવ અંગે કાનજીભાઈ વિરાભાઈ ભરવાડની ફરિયાદ આધારે લીંબાસી પોલીસે આશરે ૪૦ અને ૫૦ વર્ષની વયના બે અજાણ્યા શખ્સો વિરુદ્ધ ગુનો નોંધી વધુ તપાસ હાથ ધરી છે.
