અમદાવાદ,રવિવાર
ગાંધીનગર સેક્ટર-૮માં રહેતા નિવૃત શિક્ષિકાને ડીજીટલ એરેસ્ટ કરીને મની લોન્ડરીંગનો કેસ થયાનું કહીને સુપ્રિમ કોર્ટ, મુંબઇ ક્રાઇમ બ્રાંચ, એરેસ્ટ ઓર્ડર સહિતના ડોક્યુમેન્ટ વોટ્સએપથી મોકલવાની સાથે સિગ્નલ નામની એપ્લીકેશનનો ઉપયોગ કરીને સતત મોનીટરીંગ કરીને એક કરોડની માતબર રકમ પડાવીને છેતરપિંડી આચરવામાં આવી હોવાની ઘટના સામે આવી છે. જે અંગે ગાંધીનગર રેંજના સાયબર સેલ દ્વારા ટેકનીકલ એનાલીસીસના આધારે તપાસ શરૂ કરી છે.
ગાંધીનગર સેક્ટર-૮માં રહેતા ૬૫ વર્ષીય સ્મિતાબેન પટેલ નિવૃત શિક્ષક તરીકે જીવન પસાર કરે છે. તેમના પતિ અને એક પુત્ર સિંગાપુરમાં રહે છે. જ્યારે બીજો પુત્ર ગાંધીનગર ખાતે રહે છે. ગત ૧૬મી જાન્યુઆરીના રોજ સ્મિતાબેન વડનગરમાં સામાજિક પ્રસંગમાં ગયા હતા. ત્યારે અજાણ્યા મોબાઇલ નંબરથી કોલ આવ્યો હતો. કોલ કરનારે પોતાની ઓળખ દુરચંસાર વિભાગના અધિકારી તરીકે આપીને જણાવ્યું હતું કે તમારા નામે બીજુ સીમ કાર્ડ ઇસ્યુ થયું છે અને તે નંબર પરથી લોકોને કોલ કરીને સતત ધમકી આપવામાં આવતી હોવાની ફરિયાદ મળી છે. આ માટે ક્રાઇમબ્રાંચ તપાસ કરી રહી છે.
થોડીવાર બાદ અન્ય એક વ્યક્તિએ સીબીઆઇની અધિકારી તરીકે ઓળખ વિડીયો કોલ કરીને ડરાવ્યા હતા કે નરેશ ગોયલના મની લોન્ડરીંગ કેસમાં સ્મિતાબેનના બેંક એકાઉન્ટનો ઉપયોગ થયો છે અને મની લોન્ડરીંગના બે કરોડ ખાતામાં જમા થયા છે. જેની સામે ૨૦ લાખનું કમિશન મળ્યું છે. આમ, સ્મિતાબેનને કેસની ધમકી આપીને ડરાવવામાં આવ્યા હતા. ત્યારબાદ ડીજીટલ એરેસ્ટ કરીને તેમના નાણાં તપાસવા માટેનું કહીને ૯૯ લાખ જેટલી રકમ ટ્રાન્સફર કરાવી હતી. તેમજ સિગ્નલ નામની એપ્લીકેશન ડાઉનલોડ કરાવીને તેમાં સતત હાજરી નોંધતા હતા અને એપ્લીકેશનથી જ કોલ કરવામાં આવતો હતો. આમ, સતત એક મહિના સુધી ડરાવીને નાણાં પડાવ્યા બાદ પરત ન આવતા સ્મિતાબેનને શંકા ગઇ હતી અને તપાસ કરતા તેમની સાથે સાયબર ક્રિમીનલ દ્વારા છેતરપિંડી કરવામાં આવી હોવાની જાણ થઇ હતી. આ અંગે ગાંધીનગર રેંજ સાયબર ક્રાઇમ સેલ દ્વારા તપાસ શરૂ કરવામાં આવી છે.
ગાંધીનગરના જાણીતા મહિલા તબીબ સાથે દેશની સૌથી મોટી રૂપિયા ૨૦ કરોડની છેતરપિંડી કરવામાં આવી હતી
ગાંધીનગરમાં રહેતા સિનિયર સિટીઝન અને જાણીતા ગાયનેક મહિલા ગાયનેક તબીબને ડીજીટલ એરેસ્ટ કરીને દેશના ઇતિહાસની સૌથી મોટી છેતરપિંડી કરવામાં આવી હતી. જેમાં મહિલા તબીબને મનીલોન્ડરીંગ, ડમી સીમ કાર્ડ તેમજ દેશ વિરોધી પ્રવૃતિનો ગુનો નોંધાયાનું કહીને કેસની તપાસ કરવાના નામે ડીજીટલ એરેસ્ટ કરીને તેમની પાસેથી ૨૦ કરોડ જેટલી રકમની ઉચાપત કરવામાં આવી હતી. જેમાં તેમના તમામ બેંક એકાઉન્ટમાં રહેલા નાણા, શેર અને મિલકતો વેચાણ કરાવવામાં આવ્યા હતા. જો કે આ કેસમાં હજુ સુધી પોલીસ આરોપીઓની કડીને મેળવી શકી નથી.
