Indian Open Kickboxing Cup : તા.4થી 8 ફેબ્રુઆરી 2026 દરમિયાન નવી દિલ્હીના કે.ડી.જાધવ ઇન્ડોર સ્ટેડિયમ ખાતે યોજાયેલા 5મા ઇન્ડિયન ઓપન કિક બોક્સિંગ કપમાં વડોદરાની અક્ષદા દળવીએ ઉત્તમ દેખાવ કર્યો છે. અક્ષદાએ લાઇટ કોન્ટેક્ટ કેટેગરીમાં ગોલ્ડ મેડલ તથા પોઇન્ટ ફાઇટમાં બ્રોન્ઝ મેડલ મેળવી પોતાની રમતિયાળ પ્રતિભા સાબિત કરી છે.
અક્ષદાના પિતા અખબાર વિતરણનું કાર્ય કરે છે. બાળપણથી જ પિતાની શિસ્ત અને સમયપાલનને નજીકથી જોતા અક્ષદાએ મહેનતને જીવનમંત્ર બનાવ્યો છે. વહેલી સવારે પિતાને અખબાર પહોંચાડવામાં મદદ કરીને તે અભ્યાસ અને તાલીમ માટે સમય ફાળવે છે.
અક્ષદા હાલ મહારાજા સયાજીરાવ યુનિવર્સિટી ઓફ બરોડામાં શારીરિક શિક્ષણ અને રમતગમતના સ્નાતક અભ્યાસક્રમના બીજા વર્ષની વિદ્યાર્થીની છે. જિલ્લા, રાજ્ય, રાષ્ટ્રીય અને આંતરરાષ્ટ્રીય સ્તરે મળીને તેણે કુલ 24 ગોલ્ડ, 8 સિલ્વર અને 3 બ્રોન્ઝ મેડલ જીત્યા છે.
તે ખેલો ઇન્ડિયા વેસ્ટ ઝોન સ્પર્ધામાં બ્રોન્ઝ મેડલ વિજેતા રહી છે તેમજ ગયા વર્ષે ઓલ ઇન્ડિયા ઇન્ટર-યુનિવર્સિટી કિકબોક્સિંગ ચેમ્પિયનશિપમાં એમ.એસ.યુ.નું પ્રતિનિધિત્વ કરતાં ગોલ્ડ મેડલ મેળવ્યો હતો.
અક્ષદા હાલમાં ટર્કિશ ઓપન વર્લ્ડ કપ તથા આવનારી આંતરરાષ્ટ્રીય સ્પર્ધાઓ માટે મહેનત કરી રહી છે. તે વાકો ગુજરાતના પ્રમુખ સિદ્ધાર્થ ભાલેઘરના માર્ગદર્શન હેઠળ તાલીમ લઈ રહી છે. સાધારણ પરિવારમાંથી શરૂ થયેલી અક્ષદાની સફર આજે આંતરરાષ્ટ્રીય કક્ષાએ પહોંચી છે અને તેણે વડોદરાનું ગૌરવ વધાર્યું છે.
