એક મણના 100થી 600 રૂપિયા ભાવે હરાજી વંથલી પંથકમાં થતા ચીકુની રાજસ્થાનના જયપુર, ઉદયપુર તેમજ ગુજરાતના મોટાં શહેરોમાં માંગ
જૂનાગઢ, : બાગાયત પાક માટે જાણીતા વંથલી પંથકમાં ચીકુની સિઝન શરૂ થઈ ગઈ છે. હાલ રોજ વંથલી યાર્ડમાં 6થી 7,000 મણ ચીકુની આવક થઈ રહી છે, જેની પ્રતિ મણ રૂા. 100થી લઈ 600- 700 ના ભાવે હરાજી થાય છે. વંથલી પંથકમાં થતા ચીકુની રાજસ્થાનના જયપુર, ઉદયપુર સહિતના શહેરોમાં ભારે માંગ રહે છે.
વંથલી તાલુકામાં 34,000થી વધુ હેક્ટરમાં બાગાયતી વાવેતર વિસ્તાર આવેલો છે. વંથલી ઉપરાંત શાપુર, કાજલીયાડા, કણઝડી, સાંતલપુર, ધંધુસર, નાવડા, કણઝા સહિતના ગ્રામ્ય વિસ્તારોમાં મોટા પ્રમાણમાં ચીકુના બગીચા આવેલા છે. છેલ્લા થોડા દિવસોથી ચીકુની સિઝન શરૂ થઈ ગઈ છે. હાલ વંથલી યાર્ડમાં રોજ 3500થી 4000 બોરી ચીકુની આવક થઈ રહી છે. એક બોરીમાં 35થી 40 કિલો ચીકુ હોય છે. આ મુજબ રોજ 6થી 7,000 મણ ચીકુ આવી રહ્યા છે. જેના મણદીઠ ભાવ 100થી માંડી 600થી 700 રૂપિયા લેખે હરરાજી થાય છે. આ વખતે ચીકુના મહતમ ભાવ થોડા ઓછા મળી રહ્યા છે. આગામી દિવસોમાં ચીકુની વધુ આવક થવાનો અંદાજ છે.
વંથલી પંથકમાં થતા કણીદાર ચીકુ અન્ય ચીકુની સરખામણીએ ઓછા બગડતા હોવાથી અમદાવાદ, સુરત, વડોદરા, મહેસાણા, રાજકોટ સહિતના શહેરો તેમજ રાજસ્થાનના ઉદયપુર, જયપુર જેવા અન્ય રાજ્યોના શહેરોમાં પણ આ ચીકુની માંગ રહે છે. હાલ ઓછી ગરમી હોવાથી અન્ય રાજ્યમાં કાચા ચીકુ મોકલવામાં સરળતા રહે છે. હિટવેવ શરૂ થયા બાદ લાંબા અંતરમાં ચીકુ મોકલવાનું બંધ થઈ જશે.
