– નડિયાદના સીડીપીઓને આવેદન આપી રજૂઆત
– નિરાકરણ નહીં આવે તો, ઓનલાઇન કામગીરીનો બહિષ્કાર અને અનિશ્ચિત મુદતની હડતાલની ચીમકી
નડિયાદ : ખેડા જિલ્લાના મુખ્ય મથક નડિયાદ ખાતે મંગળવારે આંગણવાડી કાર્યકર અને હેલ્પર બહેનો દ્વારા પડતર માંગણીઓ અને કામના ભારણ મુદ્દે ઉગ્ર પ્રદર્શન કરવામાં આવ્યું હતું. નડિયાદ તાલુકા અને આસપાસના વિસ્તારોની ૨૦૦થી વધુ આંગણવાડી બહેનો એકત્રિત થઈને પોતાની વ્યથા ઠાલવવા માટે તંત્ર સમક્ષ પહોંચી હતી. ખાસ કરીને છેલ્લા કેટલાક સમયથી વહીવટી પ્રક્રિયામાં ઓનલાઇન કામગીરીનું પ્રમાણ વધતા બહેનોમાં ભારે રોષ જોવા મળી રહ્યો છે.
આ પ્રદર્શન દરમિયાન આંગણવાડી બહેનો દ્વારા જણાવવામાં આવ્યું હતું કે, સરકાર દ્વારા સોંપવામાં આવતી દૈનિક કામગીરીની સાથે હવે સતત ઓનલાઇન ડેટા એન્ટ્રી કરવાનો આગ્રહ રાખવામાં આવે છે. મોબાઈલ એપ્લિકેશનમાં વિગતો ભરતી વખતે વારંવાર ટેક્નિકલ ખામીઓ સર્જાય છે. ગ્રામ્ય વિસ્તારોમાં ઇન્ટરનેટ કનેક્ટિવિટી અને નેટવર્કની પૂરતી સુવિધા ન હોવાથી એક જ એન્ટ્રી કરવામાં કલાકોનો સમય વેડફાઈ રહ્યો છે. કામના ભારણ અંગે રજૂઆત કરતા બહેનોએ જણાવ્યું હતું કે, સતત મોબાઈલ પર ઓનલાઇન એન્ટ્રી કરવાના દબાણને કારણે તેમનું મૂળભૂત ફિલ્ડ વર્ક પ્રભાવિત થઈ રહ્યું છે. આંગણવાડીનું મુખ્ય કાર્ય બાળકો અને સગર્ભા કે ધાત્રી માતાઓની સીધી સેવા કરવાનું છે, પરંતુ ઓનલાઇન રિપોટગ પાછળ વધુ સમય જતો હોવાથી આ સેવાઓ પર વિપરીત અસર પડી રહી છે. ટેક્નિકલ સમજણના અભાવે પણ અનેક બહેનોને મુશ્કેલીનો સામનો કરવો પડે છે.
આ પ્રશ્નોના ઉકેલ માટે આંગણવાડી બહેનોના પ્રતિનિધિ મંડળ દ્વારા તાલુકાના સીડીપીઓને લેખિત આવેદનપત્ર સુપરત કરવામાં આવ્યું હતું. આ આવેદનમાં માગણી કરવામાં આવી છે કે, ઓનલાઇન કામગીરીને સરળ બનાવવામાં આવે અને તે માટે જરૂરી ટેક્નિકલ સપોર્ટ પૂરો પાડવામાં આવે. જે કામગીરીમાં બિનજરૂરી જટિલતા છે તેને દૂર કરી વહીવટી બોજ ઓછો કરવામાં આવે જેથી બહેનો અન્ય શૈક્ષણિક અને આરોગ્યલક્ષી કાર્યોેમાં ધ્યાન આપી શકે. આવેદનપત્ર આપતી વખતે બહેનોએ વહીવટી તંત્રને ચીમકી પણ આપી હતી કે, જો આ માંગણીઓ પર સત્વરે ધ્યાન આપવામાં નહીં આવે તો તેઓ જલદ આંદોલન તરફ આગળ વધશે. બહેનોએ સ્પષ્ટ કર્યું હતું કે, જો સરકાર દ્વારા કોઈ યોગ્ય નિરાકરણ લાવવામાં ન આવ્યું તો આગામી ૫ તારીખથી તમામ આંગણવાડી બહેનો ઓનલાઇન કામગીરીનો બહિષ્કાર કરશે અને અનિશ્ચિત મુદતની હડતાલ પર ઉતરી જશે.
