મુંબઈ વડોદરા ભારતમાલા એક્સપ્રેસ હાઈવે ઉપર તેમજ ડભોઇ પાસેથી પસાર થતાં સ્ટેટ હાઈવે પર ગાડીમાં ગુપ્ત ખાના બનાવી દારૂની થતી હેરાફેરી જિલ્લા પોલીસે ઝડપી પાડી પાંચ શખ્સોની ધરપકડ કરી હતી.
પ્રાપ્ત માહિતી મુજબ સફેદ રંગની એક મહિન્દ્રા મેક્સ નંબર વગરની ગાડીમાં ગુપ્ત ખાનું બનાવી તેમાં દારૂનો જથ્થો ભરી તે ગાડી સુરતથી વડોદરા તરફ જવાની છે તેવી માહિતીના આધારે કરજણ તાલુકાના સાંપા ગામ નજીક વોચ ગોઠવવામાં આવી હતી. દરમ્યાન બાતમી મુજબની ગાડી આવતા તેને કોર્ડન કરી રોકી હતી. ગાડીના ચાલક ભજનલાલ રતનારામ ગોદારા બીિશ્નોઇ રહે દેવપુરા, તાલુકો ચીતલવાના જીલ્લો ઝાલોર રાજસ્થાન ને સાથે રાખી ગાડીમાં તપાસ હાથ ધરવામાં આવી હતી ગાડીમાં પાછળની બોડી ઉંચી કરીને જોતા તેમાં એક ગુપ્ત ખાનું બનાવેલું જણાયું હતું. આ ખાનામાંથી રૂપિયા 4.45 લાખ કિંમતની દારૂ બિયરની 1276 નંગ બોટલો મળી હતી પોલીસે દારૂનો જથ્થો એક મોબાઈલ અને ગાડી મળી કુલ 9.50 લાખનો મુદ્દામાલ જપ્ત કર્યો હતો. પોલીસે ડ્રાઇવર ભજનલાલની પૂછપરછ કરતા તેણે જણાવ્યું હતું કે રામલાલ બાલારામ બિશનોઈ રહે ચીડીયા, તાલુકો સાચોર, જીલ્લો ઝાલોર રાજસ્થાન એ વાપીથી આગળ મહારાષ્ટ્ર બોર્ડર પરથી ગાડીમાં દારૂ ભરાવી આપેલ અને વડોદરા પહોંચી ફોન કરવા જણાવ્યું હતું. આ અંગે કરજણ પોલીસમાં ગુનો દાખલ કરવામાં આવ્યો હતો.
અન્ય બનાવમાં બોડેલી તરફથી બે કાર વડોદરા તરફ જવાની છે તેવી માહિતીના આધારે ડભોઇ તાલુકાના ફરતીકુઈ બસ સ્ટેન્ડ પાસે જિલ્લા એલસીબીના સ્ટાફે વોચ ગોઠવી હતી ત્યારે એક કારને રોકી તેમાં તપાસ કરતા વચ્ચેની સીટમાં ગુપ્ત ખાનું બનાવ્યું હતું જેમાં 89 હજાર કિંમતની 261 નંગ બોટલો મળી હતી. પોલીસે કુલ 1.89 લાખ કિંમતનો મુદ્દામાલ કબજે કરી નગીન સેગલાભાઈ રાઠવા રહે ખોડવાનીયા, તાલુકો જીલ્લો છોટાઉદેપુરની ધરપકડ કરી હતી. અન્ય બનાવમાં ફરતીકુંઈ બસ સ્ટેન્ડ પાસે જ પોલીસે અન્ય એક કારને રોકી તેમાંથી 2.16 લાખ કિંમતની 792 નંગ દારૂની બોટલો સહિત કુલ 7.34 લાખનો મુદ્દામાલ કબજે કરી વડોદરામાં કરોળિયા ગામ પાસે રહેતા ચૌહાણ રણજીતસિંહ ભીખુસીિંહ અને મહેશ પ્રભાતભાઈ પરમારની ધરપકડ કરી બંનેની વધુ પૂછપરછ હાથ ધરવામાં આવી છે.
