મુંબઈ : મુંબઈ ઝવેરી બજારમાં આજે સોના-ચાંદીના ભાવવ વધતાં અટકી પ્રત્યાઘાતી ઘટાડા પર રહ્યા હતા. નવી માગ ધીમી હતી. વિશ્વ બજાર ઘટતાં ઘરઆંગણે ઈમ્પોર્ટ કોસ્ટ નીચી આવી હતી. વિશ્વ બજારમાં ડોલર ઈન્ડેક્સ વધતાં વૈશ્વિક સોનામાં ઉછાળે ફંડોનું સેલીંગ વધ્યાના વાવડ હતા.
વિશ્વ બજાર પાછળ ઘરઆંગણે ઝવેરી બજારોમાં આજે કિંમતી ધાતુઓના ભાવ દબાણ હેઠળ જોવા મળ્યા હતા. અમદાવાદ ઝવેરી બજારમાં આજે સોનાના ભાવ ૧૦ ગ્રામના રૂ.૧૫૦૦ તૂટયા હતા જ્યારે અમદાવાદ ચાંદીના ભાવ કિલોના રૂ.૩૦૦૦નો ઘટાડો દર્શાવતા હતા. વિશ્વ બજારમાં સોનાના ભાવ ઔંસના ૫૧૭૨ ડોલરવાળા તૂટી નીચામાં ભાવ ૫૦૧૫ સુધી ઉતરી ૫૧૦૯થી ૫૧૧૦ ડોલર રહ્યા હતા.
સોના પાછળ વૈશ્વિક ચાંદીના ભાવ પણ ઔંસના ૮૪.૫૫થી ગબડી નીચામાં ભાવ ૭૯.૬૬ થઈ ૮૪.૦૩ થી ૮૪.૦૪ ડોલર રહ્યા હતા. વિશ્વ બજારમાં સોના-ચાંદીના ભાવ આજે તૂટયા પછી ફરી તળિયેથી બાઉન્સ બેક થતા પણ જોવા મળ્યા હતા.
દરમિયાન, અમદાવાદ બજારમાં આજે સોનાના ભાવ ઘટી ૧૦ ગ્રામના ૯૯૫ના રૂ.૧૬૪૨૦૦ તથા ૯૯૯ના રૂ.૧૬૪૫૦૦ રહ્યા હતા. જ્યારે અમદાવાદ ચાંદીના ભાવ ઘટી રૂ.૨૬૫૦૦૦ રહ્યા હતા. દરમિયાન, વિશ્વ બજારમાં આજે પ્લેટીનમના ભાવ ઔંસના ૨૦૫૧ ડોલર રહ્યા હતા. પેલેડીયમના ભાવ ૧૬૩૭ ડોલર રહ્યા હતા.
દરમિયાન, મુંબઈ બુલિયન બજારમાં આજે સોનાના ભાવ રૂ.૨૨૦૦થી ૨૩૦૦ ઘટયા હતા જ્યારે મુંબઈ ચાંદીના ભાવ કિલોના રૂ.૫૨૦૦ તૂટયા હતા.મુંબઈ બજારમાં સોનાના ભાવ ઘટી ૯૯૫ના રૂ.૧૫૮૦૩૯ તથા ૯૯૯ના રૂ.૧૫૮૬૭૪ રહ્યા હતા જ્યારે મુંબઈ ચાંદીના ભાવ આજે ઘટી જીએસટી વગર રૂ.૨૬૦૦૫૬ રહ્યા હતા.
વિશ્વ બજારમાં આજે ક્રૂડતેલના ભાવ ઉછળ્યા પછી ઉંચા મથાળેથી ઘટતા જોવા મળ્યા હતા. બજારમાં બ્રેન્ટ ક્રૂડના ભાવ બેરલના ૯૨.૬૯થી વધી ઉંચામાં ભાવ ૧૧૯.૫૦ થઈ મોડી સાંજે ભાવ ૧૦૨.૮૯ ડોલર રહ્યા હતા. મુંબઈ બજારમાં આજે પ્લેટીનમના ભાવ ૧૦ ગ્રામના રૂ.૧૫૦૦ ઘટયા હતા. પ્લેટીનમના ભાવ નીચામાં રૂ.૬૭૩૯૯ થઈ રૂ.૬૭૪૭૭ રહ્યા હતા.
