– ચૂંટણીની જાહેરાત પહેલાં જ મમતાનું ટ્રમ્પ કાર્ડ
– કર્મચારીઓને ‘રોપા ૨૦૦૯’ હેઠળ બાકી મોંઘવારી ભથ્થાંની ચૂકવણી માર્ચ ૨૦૨૬થી જ શરૂ થઈ જશે : મમતા
– પૂજારી અને મુઅજ્જિનને માનદ માસિક ભથ્થાં રૂ. ૫૦૦ વધારીને રૂ. ૨,૦૦૦ કરાયા : મુખ્યમંત્રી
(પીટીઆઈ) કોલકાતા: પશ્ચિમ બંગાળમાં વિધાનસભા ચૂંટણીનું બ્યુગલ ફુંકાઈ ગયું છે. ચૂંટણી પંચે રવિવારે ચૂંટણી કાર્યક્રમની જાહેરાત કરી દીધી છે. જોકે, આ પહેલાં જ મુખ્યમંત્રી મમતા બેનરજીએ રાજ્યના કર્મચારીઓ અને પેન્શનધારકોને મોંઘવારી ભથ્થાની ચૂકવણી અને મંદિરના પૂજારી તથા મસ્જિદમાં અઝાન પોકારનાર ‘બાંગી’ના ભથ્થામાં વધારાની જાહેરાત કરીને માસ્ટર સ્ટ્રોક માર્યો છે.
પશ્ચિમ બંગાળમાં મુખ્યમંત્રી મમતા બેનરજીએ વિધાનસભા ચૂંટણીની જાહેરાત સાથે આચારસંહિતા લાગુ થાય તે પહેલાં જ રાજ્યના કર્મચારીઓ અને પેન્શનધારકો માટે ડીએ તેમજ પૂજારી અને મુઅજ્જિન માટે ભથ્થામાં વધારો કરવાની જાહેરાત કરી દીધી હતી. રાજ્યમાં ડીએનો લાભ શિક્ષકો, શૈક્ષણિક સંસ્થાઓના બિન શૈક્ષણિક કર્મચારીઓ અને ગ્રાન્ટેડ સંસ્થાઓમાં કામ કરતા કર્મચારીઓને મળશે.
મમતા બેનરજીએ સોશિયલ મીડિયા એક્સ પર લખ્યું કે તેમને એ જાહેરાત કરતા આનંદ થઈ રહ્યો છે કે તેમની ‘મા-માટી-માનુષ’ સરકારે કર્મચારીઓ અને પેન્શનધારકોને આપેલું વચન પૂરું કર્યું છે. તેમણે લાખો શિક્ષકો, બિનશૈક્ષણિક કર્મચારી અને પંચાયત, નગર નિગમ તથા અન્ય સ્થાનિક એકમો જેવી ગ્રાન્ટેડ સંસ્થાઓના કર્મચારી અને પેન્શનધારકોને પણ લાભની જાહેરાત કરી છે. મુખ્યમંત્રી મમતા બેનરજીએ કહ્યું કે, કર્મચારીઓને ‘રોપા ૨૦૦૯’ હેઠળ બાકી મોંઘવારી ભથ્થાંની ચૂકવણી માર્ચ ૨૦૨૬થી જ શરૂ થઈ જશે.
અન્ય એક સંદેશામાં મુખ્યમંત્રી મમતા બેનરજીએ પશ્ચિમ બંગાળમાં પૂજારીઓ અને મુઅજ્જિનો એટલે કે મસ્જિદમાં અઝાન માટે બાંગ પોકારનાર ‘બાંગી’ના માનદ માસિક ભથ્થામાં રૂ. ૫૦૦નો વધારો કરવાની જાહેરાત પણ કરી હતી. આ સાથે પૂજારીઓ અને મુઅજ્જિનને હવે માસિક રૂ. ૨,૦૦૦નું માનદ વેતન મળશે. મમતા બેનરજીએ એક્સ પર પોસ્ટ લખીને આ જાહેરાત કરી હતી.
મુખ્યમંત્રી મમતા બેનરજીએ લખ્યું કે, આ લોકો આપણા સમુદાયના આધ્યાત્મિક અને સામાજિક જીવનને જાળવી રાખવામાં મહત્વની ભૂમિકા ભજવે છે, તેથી તેમને સહયોગ આપવામાં આવી રહ્યો છે. તેમણે આ અંગે નવી અરજીઓને પણ મંજૂરી આપી દીધી છે. મમતાએ કહ્યું, તેમની સરકાર દરેક સમુદાયનું સન્માન કરે છે. તેઓ સુનિશ્ચિત કરે છે કે અમારી ધાર્મિક અને સાંસ્કૃતિક વારસાના સંરક્ષકને પૂર્ણ સહયોગ અને માન્યતા મળે.
