Baroda Cricket Association Election Case: બરોડા ક્રિકેટ એસોસિએશન (BCA)ની તાજેતરમાં યોજાયેલી ચૂંટણી મામલે ગુજરાત હાઇકોર્ટે મહત્ત્વનો ચુકાદો આપ્યો છે. વડોદરાના અરજદારો દ્વારા દાખલ કરાયેલી અરજી મંજૂર રાખતા હાઇકોર્ટે પૂર્વ ભારતીય ક્રિકેટર કિરણ મોરે સહિત ચાર ઉમેદવારોને BCAના હોદ્દેદારોની ચૂંટણી લડવા માટે અયોગ્ય જાહેર કર્યા છે.
ગુજરાત હાઇકોર્ટમાં રિટ પિટિશન દાખલ
માહિતી મુજબ વડોદરાના પ્રદીપસિંહ સોલંકી અને રામચંદ્ર પ્રજાપતિ દ્વારા ગુજરાત હાઇકોર્ટમાં અરજી દાખલ કરવામાં આવી હતી. અરજદારો દ્વારા ચૂંટણી દરમિયાન કેટલાક ઉમેદવારોના નોમિનેશન ફોર્મ સ્વીકારવાના રિટર્નિંગ ઓફિસરના નિર્ણયને પડકારવામાં આવ્યો હતો.
પૂર્વ ક્રિકેટર કિરણ મોરે ચૂંટણી માટે અયોગ્ય જાહેર
હાઇકોર્ટે કેસની સુનાવણી બાદ પૂર્વ ક્રિકેટર કિરણ મોરે, અમુલ જીકાર, અનંત ઇન્દુલકર અને અમર પેટીવાલાને ચૂંટણી માટે અયોગ્ય જાહેર કર્યા છે. સાથે જ ઉપરોક્ત ઉમેદવારોના નોમિનેશન ફોર્મ સ્વીકારવાનો રિટર્નિંગ ઓફિસરનો નિર્ણય પણ રદ કરવામાં આવ્યો છે. સાથે હાલની વચગાળાની વ્યવસ્થા બે અઠવાડિયા માટે વધારવાની પણ મંજૂરી આપવામાં આવી છે.
BCAની 31 બેઠકો માટે યોજાયું હતું મતદાન
ઉલ્લેખનીય છે કે, 15 ફેબ્રુઆરીના રોજ BCAના પ્રમુખ સહિત કુલ 31 હોદ્દાઓ માટે મતદાન યોજાયું હતું. કુલ 2063 સભ્યોમાંથી 1430 સભ્યોએ મતદાન કર્યું હતું. ચૂંટણીમાં રોયલ અને સત્યમેવ જયતે જૂથ વચ્ચે ગઠબંધન થયું હતું જ્યારે સામે પક્ષે રિવાઇવલ જૂથ મેદાનમાં હતું.
આ પણ વાંચો: જામનગર આવેલા રાજકોટના સોની વેપારી સાથે 2.50 લાખની સોનાની બંગડીની છેતરપિડી : તેના જ મિત્ર સહિત 3 સામે ફરિયાદ
સેક્રેટરી અને ટ્રેઝરર પદના ઉમેદવારો અયોગ્ય જાહેર
ચૂંટણી દરમિયાન રોયલ-સત્યમેવ જયતે જૂથના સેક્રેટરી પદના ઉમેદવાર અનંત ઇન્દુલકર અને ટ્રેઝરર પદના ઉમેદવાર અમર પેટીવાલા તેમજ રિવાઇવલ જૂથના પ્રમુખ પદના ઉમેદવાર કિરણ મોરે અને સેક્રેટરી પદના ઉમેદવાર અમુલ જીકારને અયોગ્ય જાહેર કરવાની માંગ સાથે હાઇકોર્ટમાં અરજી કરવામાં આવી હતી.
અયોગ્ય જાહેર થયેલા ઉમેદવારો હવે અપીલની તૈયારીમાં
હાઇકોર્ટના આ ચુકાદા બાદ બરોડા ક્રિકેટ એસોસિએશન તેમજ શહેરના ક્રિકેટ વર્તુળોમાં ફરી એકવાર ચર્ચા જાગી છે. જો કે, આ ચારેય ઉમેદવારો દ્વારા હાઇકોર્ટના નિર્ણય સામે અપીલ કરવામાં આવે તેવી શક્યતા પણ વ્યક્ત કરવામાં આવી રહી છે.
