Baroda Dairy Election : બરોડા ડેરીની આજે ચાર બેઠક માટે યોજાનારી ચૂંટણી માટે મતદાન શરૂ થતા દૂધ ઉત્પાદકોમાં ભારે ઉત્સાહ જોવા મળી રહ્યો છે.
બરોડા ડેરીની કુલ 13 બેઠકમાંથી નવ બેઠક બિનહરિત થઈ જતા બાકીની ચાર બેઠક માટે આજે સવારે 9 વાગે મતદાન શરૂ થયું છે. જેમાં સૌથી વધુ રસાકસી ડેસર બેઠક ઉપર જામી છે.
આ ઉપરાંત વડોદરા ગ્રામ્ય, ડભોઇ અને પાવી જેતપુરની બેઠકો માટે પણ ઉમેદવારો અને તેમના ટેકેદારો મતદારો સાથે આવી રહ્યા છે. જેને પગલે ડેરીના પ્રાંગણમાં લોકો મોટી સંખ્યામાં નજરે પડી રહ્યા છે. ચૂંટણીના પ્રાંગણમાં ડેરીના પૂર્વ પ્રમુખ અને તેમના ટેકેદારોની હાજરી જોવા મળી હતી.
પ્રાથમિક વિગતો મુજબ શરૂઆતના બે કલાકમાં 4 ઝોનમાં સરેરાશ 40% જેટલું મતદાન થઈ ગયું છે. બપોરે ત્રણ વાગ્યા સુધી મતદાન ચાલુ રહેશે અને ત્યારબાદ તરત જ ગણતરી શરૂ થતા સાંજે 6 વાગ્યા સુધીમાં પરિણામ આવી જાય તેવી શક્યતા છે.
