જિલ્લા કાનૂની સેવા સત્તા મંડળ વડોદરા દ્વારા વડોદરાના પ્રિન્સિપલ ડિસ્ટ્રિક્ટ જજ અને ડિસ્ટ્રિક્ટ લીગલ સર્વિસ ઓથોરિટી ચેરમેન વી.કે. પાઠકની અધ્યક્ષતામાં આ વર્ષની ત્રીજી મેગા નેશનલ લોક અદાલતનું આજરોજ સમગ્ર જિલ્લામાં આયોજન કરવામાં આવ્યું હતું.
લોક અદાલત સમક્ષ રજૂ થયેલ 63,230 કેસો પૈકી અકસ્માતના 113 તથા ચેક રિટર્નના 2225 મળી કુલ 3473 કેસો સમાધાનથી પૂર્ણ થયા હતા. તથા 57,747 સ્પેશિયલ સીટીંગ મળી વડોદરા જિલ્લાના પેન્ડિંગ કુલ 61,220 કેસો પૂર્ણ થયા હતા. આ ઉપરાંત ટ્રાફિક ચલણ, ગેસના બિલ જેવા પ્રિલીટીગેશનના 51,864 કેસોમાં સમાધાન થયું હતું. આ દરમ્યાન ટ્રાફિક નિયમ ભંગના બાકી નીકળતા કુલ 50,090 ચલણની રકમ ભરપાઈ થઈ હતી. આમ, લોક અદાલતમાં સમાધાનથી રૂ.165,50,20,659 રકમનું સેટલમેન્ટ થયું હતું. જેમાં મુખ્યત્વે કરજણ ખાતે બે મોટી કંપનીઓ વચ્ચેના કોમર્શિયલ સિવિલ દાવાના વિવાદમાં કોર્ટના તેમજ પક્ષકારોના વકીલોના પ્રયત્નોથી 64 કરોડમાં સમાધાન થતા વિવાદ સમેટાયો હતો. જ્યારે કરજણની કોર્ટમાં વર્ષ 2015થી બે સગા ભાઈઓ વચ્ચે ચાલી રહેલ વડીલોપાર્જિત જમીન વિવાદનો લોક અદાલતના માધ્યમથી અંત આવ્યો હતો. તેમજ 85 લાખ રકમના ચેક રીટર્નના સાત વર્ષ જૂનો કેસ તથા 37.24 કરોડ રકમના ચેક રીટર્ન કેસમાં કોર્ટના તેમજ પક્ષકારોના વકીલોના પ્રયત્નોથી સમાધાનથી પૂર્ણ થયા હતા. મહત્વનું છે કે, સાવલી કોર્ટમાં 30 વર્ષ જૂના શ્રી મુગતરામ મહારાજી જગ્યાના કૌટુંબિક વિવાદમાં સમાધાન થયું હતું. હવે આ ધાર્મિક જગ્યામાં આસ્થા ધરાવતા લોકો જઈ શકશે.
