Baroda Cricket Association Election : વડોદરા ખાતે બરોડા ક્રિકેટ એસોસિએશન (બીસીએ)ની વિવાદાસ્પદ ચૂંટણી હવે વધુ રોમાંચક અને જટિલ બની રહી છે. ચૂંટણી પ્રક્રિયા દરમિયાન ઊભા થયેલા વિવાદો વચ્ચે હવે મતગણતરીનું મહત્વ પણ વધ્યું છે.
રાજ્યની હાઈકોર્ટે ચાર ઉમેદવારોને ગેરલાયક ઠેરવતાં સમગ્ર બીસીએમાં ભારે હલચલ મચી ગઈ છે. ચુકાદાના પગલે માત્ર આ ચાર ઉમેદવારો જ નહીં પરંતુ અન્ય 28 પદોના ઉમેદવારો પણ અનિશ્ચિતતામાં ફસાઈ ગયા છે.
રોયલ-સત્યમેવ જૂથના સૂત્રો અનુસાર, હાઈકોર્ટે ઉમેદવારોને અપીલ કરવા માટે 15 દિવસનો સમય આપ્યો છે. હાલ જૂથમાં ચર્ચા ચાલી રહી છે કે લેટર પેટેન્ટ અપીલ (LPA) દાખલ કરવી કે નહીં. પ્રમુખ, સેક્રેટરી અને ટ્રેઝરરના મહત્વના પદોને લઈને તકરાર ચાલી રહી છે. કાઉન્ટિંગ આગળ વધે તો ચિત્ર વધુ સ્પષ્ટ થશે, પરંતુ તે પહેલાં કાયદાકીય માર્ગદર્શન મેળવવાનું જૂથએ નક્કી કર્યું છે.
ચુકાદામાં એ પણ ઉલ્લેખ થયો છે કે ચૂંટણી કમિશનરની ટીમે યોગ્ય સમયે નિર્ણય ન લેતા મામલો કોર્ટ સુધી પહોંચ્યો, જેના કારણે હાલની સ્થિતિ ઉભી થઈ છે.
બીજી તરફ રિવાઈવલ જૂથ પણ આ મુદ્દે ચુપ બેસવા તૈયાર નથી. જૂથના સૂત્રો મુજબ, કાયદાકીય ગૂંચવણ ઊભી કરીને જીતવાનો પ્રયાસ થઈ રહ્યો છે. તેમના બંને ઉમેદવારો પણ અપીલમાં જવાની તૈયારીમાં છે અને કોર્ટ પાસે સમયમર્યાદા માગવામાં આવી હોવાનું જાણવા મળે છે.
હવે આવનારા દિવસોમાં કોર્ટમાં થનારી અપીલો અને કાઉન્ટિંગ પ્રક્રિયા બીસીએનું ભવિષ્ય નક્કી કરશે.
અત્રે નોંધનીય છે કે, સેક્રેટરી પદના બંને જૂથના ઉમેદવાર અયોગ્ય જાહેર થયા છે. જ્યારે પ્રમુખ પદના બેમાંથી એક ઉમેદવાર અયોગ્ય જાહેર થયા છે. જેથી અપીલને બાદ કરતા હાલ પ્રમુખ પદે ઉમેદવાર બિનહરીફ થાય તેમજ સેક્રેટરી પદે રિ-ઈલેક્શન થાય તેવી બીસીએ વર્તુળમાં ચર્ચાઓ છે. તો બીજી તરફ, કોર્ટના જજમેન્ટને લઇ બંને જૂથો લડત માટે કાયદાકીય સમજ મેળવવા દોડધામ કરી રહ્યા છે.
અત્રે ઉલ્લેખનીય છે કે, વડોદરાના પ્રદીપસિંહ સોલંકી અને રામચંદ્ર પ્રજાપતિ દ્વારા ગુજરાત હાઇકોર્ટમાં અરજી દાખલ કરવામાં આવી હતી. અરજદારો દ્વારા ચૂંટણી દરમિયાન કેટલાક ઉમેદવારોના નોમિનેશન ફોર્મ સ્વીકારવાના રિટર્નિંગ ઓફિસરના નિર્ણયને પડકારવામાં આવ્યો હતો.
હાઇકોર્ટે કેસની સુનાવણી બાદ પૂર્વ ક્રિકેટર કિરણ મોરે, અમુલ જીકાર, અનંત ઇન્દુલકર અને અમર પેટીવાલાને ચૂંટણી માટે અયોગ્ય જાહેર કર્યા છે.
રોયલ-સત્યમેવ જયતે જૂથના સેક્રેટરી પદના ઉમેદવાર અનંત ઇન્દુલકર અને ટ્રેઝરર પદના ઉમેદવાર અમર પેટીવાલે તેમજ રિવાઇવલ જૂથના પ્રમુખ પદના ઉમેદવાર કિરણ મોરે અને સેક્રેટરી પદના ઉમેદવાર અમુલ જીકાર છે.
મહત્વનું છે કે, 15 ફેબ્રુઆરીના રોજ BCAના પ્રમુખ સહિત કુલ 31 હોદ્દાઓ માટે મતદાન યોજાયું હતું. કુલ 2063 સભ્યોમાંથી 1430 સભ્યોએ મતદાન કર્યું હતું. ચૂંટણીમાં રોયલ અને સત્યમેવ જયતે જૂથ વચ્ચે ગઠબંધન થયું હતું જ્યારે સામે પક્ષે રિવાઇવલ જૂથ મેદાનમાં હતું. હાલ મત પેટીઓ ફતેગંજ વિસ્તારની હીલ મેમોરિયલ શાળા ખાતે સ્ટ્રોંગ રૂમમાં મુકાઈ છે.
