Ahmedabad News : અમદાવાદ શહેર ક્રાઇમ બ્રાન્ચે ચોક્કસ બાતમીના આધારે દાણીલીમડા વિસ્તારમાં રેડ મારીને જાહેરમાંથી ભારતીય બનાવટના વિદેશી દારૂનો જથ્થો પકડી પાડ્યો છે. પીરાણા વૉટર પંપ પાસે રોડ પર પોલીસે રેડ પાડી હતી. જેમાં પોલીસે રિક્ષામાં CNG બોટલ કાઢીને વિદેશની દારૂ સંતાડનાર એક શખસને ઝડપી પાડ્યો છે. પોલીસે 1 લાખનો મુદ્દામાલ જપ્ત કરીને આગળની કાર્યવાહી હાથ ધરી છે.
રિક્ષામાં CNG બોટલો કાઢીને દારૂ સંતાડનારને ક્રાઇમ બ્રાન્ચે ઝડપ્યો
આ કાર્યવાહી દરમિયાન પોલીસે મૂળ ઉત્તરપ્રદેશના ઝાંસીના અને હાલ અમદાવાદમાં વટવા વિસ્તારની કુત્બ આલમ કોલોનીમાં રહેતા 35 વર્ષીય સાદિક સોકતઅલી મિર્ઝા નામના શખસને ઝડપી પાડ્યો છે. ક્રાઇમ બ્રાન્ચે આરોપીની અટકાયત કરી ગુનો નોંધી વધુ તપાસ હાથ ધરી છે.
આ પણ વાંચો: ન્યાયની આશા ઠગારી નીવડી: ગોમતીપુરમાં પોલીસ અને પડોશીના ત્રાસથી કંટાળી ભાઈ-બહેનનો ઝેર પી આપઘાતનો પ્રયાસ
1 લાખનો મુદ્દામાલ જપ્ત
આ દરોડા દરમિયાન પોલીસે આરોપી પાસેથી કુલ રૂપિયા 1,01,740નો મુદ્દામાલ કબજે કર્યો છે. જપ્ત કરાયેલા સામાનમાં ભારતીય બનાવટના વિદેશી દારૂની 180 મિ.લી.ની 240 જેટલી સીલબંધ નાની બોટલો મળી આવી છે, જેની કિંમત રૂપિયા 21,240 થાય છે.
આ ઉપરાંત, ગુનામાં ઉપયોગમાં લેવાયેલી ઓટો રિક્ષા અને એક મોબાઇલ ફોન પણ કબજે કરવામાં આવ્યો છે. પોલીસે તમામ મુદ્દામાલ જપ્ત કરી આરોપી વિરુદ્ધ કાયદેસરની કાર્યવાહી હાથ ધરી છે.
