ચિલોડા હાઇવે ઉપર હથિયારોની હેરાફેરી વધી
ચંદ્રલા પાસે ચેકિંગ દરમિયાન દિલ્હીથી અમદાવાદ જતી બસમાંથી ઝડપાયેલા મુસાફર પાસેથી રૂપિયા 36 હજારનો મુદ્દામાલ જપ્ત
ગાંધીનગર: ગાંધીનગર શહેર નજીક ચિલોડા હિંમતનગર હાઇવે ઉપર વિદેશી દારૂની સાથે હવે હથિયારોની પણ હેરાફેરી વધી છે પોલીસે વાહન ચેકિંગ દરમિયાન ચંદ્રાલા પાસે લક્ઝરી બસમાંથી બિહારના યુવાનને પિસ્તોલ અને નવ કારતૂસ સાથે ઝડપી લીધો હતો. ૩૬ હજારનો મુદ્દામાલ કબજે કરીને તમંચો ક્યાંથી લાવ્યો હતો અને કોને આપવાનો હતો તે જાણવા માટે તપાસ શરૂ કરવામાં આવી છે.
ગાંધીનગર જિલ્લાના હાઇવે માર્ગો ઉપર અત્યાર સુધી દારૂની હેરાફેરીના કિસ્સા પ્રકાશમાં આવતા હતા. તેમાં પણ ખાસ કરીને ચિલોડા હિંમતનગર હાઇવે ઉપર લક્ઝરી બસમાં મુસાફરના સ્વાંગમાં દારૂની હેરાફેરીના કિસ્સા બહાર આવતા રહેતા હોય છે ત્યારે હવે થોડા સમયથી અહીં હથિયારોની પણ હેરાફેરી વધી રહી છે. છેલ્લા છ મહિનામાં છથી વધુ મુસાફરો લક્ઝરી બસમાં હથિયારો સાથે પકડાઈ ચૂક્યા છે ત્યારે ચિલોડા પોલીસની ટીમ ચંદ્રાલા પાસે વાહન ચેકિંગ કરી રહી હતી તે દરમિયાન દિલ્હીથી અમદાવાદ જઈ રહેલી એક બસને ઊભી રાખી હતી. જ્યાં તબક્કાવાર મુસાફરોના સામાન તપાસવાનું શરૂ કરવામાં આવ્યું હતું તે દરમિયાન એક મુસાફરના કાળા કલરના થેલામાં પોલીસને શંકા ગઈ હતી એને તપાસ કરતા તેની પાસેથી એક પિસ્તોલ અને નવ કારતૂસ મળી આવ્યા હતા. આ યુવાનની પૂછપરછ કરતા તે મૂળ બિહારનો અને હાલ નોઈડા ખાતે રહેતો શિવમસિંગ ચંદ્રભાનસિંગ રાજપુત હોવાનું બહાર આવ્યું હતું.આ પિસ્તોલ ક્યાંથી લાવ્યો હતો અને કોને આપવાની હતી તે જાણવા માટે મથામણ શરૂ કરવામાં આવી છે. હાલ તો ૩૬ હજાર ઉપરાંતનો મુદ્દામલ કબજે કરીને આ યુવાન સામે આર્મ્સ એક્ટ હેઠળ ગુનો દાખલ કરીને તપાસ કરવામાં આવી રહી છે.
