Surat Corpoation : સુરત પાલિકાની ચૂંટણી જાહેર થતાની સાથે જ રાજકીય પક્ષો સાથે હવે લોકો પણ સક્રિય બની ગયા છે. વીતી ગયેલા પાંચ વર્ષમાં ચૂંટાયેલા કેટલાક કોર્પોરેટરો મિસ્ટર ઈન્ડિયા બની ગયા હતા તેઓ પણ ટિકિટ મેળવવા માટે મરણિયા પ્રયાસ કરી રહ્યાં છે અને પોતાના વિસ્તારમાં અચાનક સક્રિય થઈ રહ્યું છે. જોકે, હવે લોકો પણ સ્માર્ટ થયા છે અને કટાક્ષ સાથે દાવેદારો-પુર્વ કોર્પોરેટરના પણ ક્લાસ લઈ રહ્યાં છે. જોકે, આવા સમયે તમાચો મારીને ગાલ લાલ રાખવાની જેમ રાજકારણીઓ હાથ જોડી લોકોના ઘર સુધી પહોંચી રહ્યાં છે.
સુરત પાલિકામાં ચૂંટાયેલા કોર્પોરેટરની ટર્મ પુરી થયા બાદ હવે ચૂંટણી માટેની જાહેરાત થઈ ગઈ છે. રાજકીય પક્ષોમાં ટીકીટ માટે દાવેદારી તો કેટલાક પક્ષોએ ઉમેદવારની જાહેરાત કરી દીધી છે. આવા સમયે હવે સુરતના રાજકારણનો માહોલ ગરમાયો છે. કેટલાક પક્ષો તો અત્યાર સુધી લોકોથી દૂર રહ્યા હતા પરંતુ ચૂંટણીના થોડા સમય પહેલા અચાનક સોશિયલ મીડિયા થ્રુ એક્ટિવ થઈ ગયા હતા. હવે ઉમેદવારોના નામની જાહેરાત થાય તે પહેલા રાજકીય પક્ષના દાવેદારો-ઉમેદવારો દોડતા થયા છે.
પાલિકામાં ચૂંટાયેલા કેટલાક કોર્પોરેટરો તો પોતાના વિસ્તારમાં અચાનક સક્રિય થઈ ગયા છે. લોકો આક્રોશપૂર્ણ રીતે કરી રહ્યાં છે આ ચુંટાયેલા કોર્પોરેટરોને તેમની સમસ્યા માટે ઘણી વખત ફોન કરતા હતા પરંતુ તેમના ફોન હંમેશા બીઝી રહેતા હતા કે નો-રિપ્લાય હતા. આવા નેતાઓ હવે અમારા વિસ્તારમાં આવી સેલ્ફી પડાવી રહ્યા છે અને લોકો સાથે અચાનક ઘરોબો રાખી રહ્યા છે. આવા પુર્વ કોર્પોરેટર કે નેતાઓના ક્લાસ હવે લોકો લઈ રહ્યાં છે અને અત્યાર સુધી ફોન કેમ રિસિવ કરતા ન હતા તેવા અણીયારા સવાલો પણ પૂછી રહ્યાં છે.
આવા દ્રશ્યો જોતાં હવે મતદારોનો મૂડ પણ બદલાયેલો જોવા મળે છે શાસક પક્ષ હોય કે વિપક્ષ કે હોય અન્ય પક્ષ લાંબા સમય સુધી દેખાતા ન હતા તેઓ હવે લોકો વચ્ચે આવી રહ્યા છે ત્યારે લોકો પણ આવા નેતાઓની પરીક્ષા લઈ રહ્યા છે જેના કારણે રાજકીય માહોલમાં વધુ ગરમાટો જોવા મળી રહ્યો છે.
