– ટાટા ગ્રુપની કંપની એર ઇન્ડિયાના CEO કેમ્પબેલ વિલ્સનનું રાજીનામું : ખોટ અને કામગીરીમાં અવરોધો કારણભૂત…
– ગણેશ દત્તા
– પશ્ચિમ એશિયામાં યુદ્ધને કારણે પડકારો વધુ જટિલ બન્યા, જેનાથી ઈંધણના ખર્ચમાં વધારો થયો, ફ્લાઈટનો સમય લંબાયો અને સંભવિત રૂટ્સ મર્યાદિત બન્યા
એચડીએફસી બેંકના વડા અતનુ ચક્રવર્તીએ રાજીનામું આપ્યું તેની પાછળના કોઇ ચોક્કસ કારણો હજુ બહાર આવ્યા નથી. પોતે સિધ્ધાંતો સાથે બાંધછોડ કરવા તૈયાર નથી એમ તેમણે કહ્યું હતું પરંતુ હવે જ્યારે એર ઇન્ડિયાના કેમ્પબેલ વિલ્સને રાજીનામું આપ્યું છે ત્યારે કોર્પોરેટ સર્કલને ખબર હતી કે એક તરફ એરઇન્ડિયાની ખોટ અને બીજી તરફ એવીયેશન ક્ષેત્રે શરૂ થયેલી તીવ્ર સ્પર્ધા સાથે દોડવામાં એર ઇન્ડિયાના સીઇઓ નિષ્ફળ થતા જોવામાં આવતા હતા. એર ઇન્ડિયાના સીઇઓ કેમ્પેબલ વિલ્સને રાજીનામું આપ્યું હોવાના અહેવાલો વહેતા થયા છે.
ભારતની બીજા નંબરે આવતી સૌથી મોટી એરલાઈન, એર ઈન્ડિયાના ચીફ એક્ઝિક્યુટિવ કેમ્પબેલ વિલ્સને પોતાના પદેથી રાજીનામું આપી દીધું છે અને હાલમાં તેઓ નોટિસ પિરિયડ પર છે તેવા અહેવાલોથી એર ઇન્ડિયાએ નવા સીઇઓ શોધવા પડશે. કહે છે કે નવા સીઇઓ શોધી લેવાયા છે પણ તેમનું નામ જાહેર કરાયું નથી.
ટાટા ગૂ્રપે મે ૨૦૨૨ માં સિંગાપોર એરલાઈન્સના લો-કોસ્ટ યુનિટ ‘સ્કૂટ’ માંથી વિલ્સનની નિમણૂક કરી હતી. આ નિમણૂક ગૂ્રપ દ્વારા સરકારી એરલાઈનને ૧૮,૦૦૦ કરોડમાં ખરીદ્યાના ચાર મહિનાથી પણ ઓછા સમયમાં કરવામાં આવી હતી. તેમનો કાર્યકાળ જુલાઈ ૨૦૨૭ માં સમાપ્ત થવાનો હતો. તે ૨૦૨૨ માં સિંગાપોર એરલાઈન્સની પેટાકંપની ‘સ્કૂટ’ (Scoot) માંથી જોડાયા હતા.
અધિગ્રહણ બાદ, ટાટા ગૂ્રપે ટાટા સન્સ અને સિંગાપોર એરલાઈન્સ લિમિટેડ વચ્ચેના ૫૧:૪૯ ના સંયુક્ત સાહસ ‘વિસ્તારા’નું એર ઈન્ડિયા સાથે વિલીનીકરણ કર્યું. પરિણામે, સિંગાપોર એરલાઈન્સ એર ઈન્ડિયામાં ૨૫.૧% હિસ્સેદાર બની, જ્યારે ટાટા સન્સ ૭૪.૯% હિસ્સો ધરાવે છે.
જોકે, વિલ્સનના ત્રીજા વર્ષમાં પરિસ્થિતિ વણસી હતી. ૧૨ જૂનના રોજ, અમદાવાદથી લંડન જતી એર ઈન્ડિયાની ફ્લાઈટ ટેકઓફના થોડા સમય બાદ જ દુર્ઘટનાગ્રસ્ત થઈ હતી. આ ઘટનાને કારણે સઘન તપાસ અને અનેક વિમાનોને કામચલાઉ ધોરણે ગ્રાઉન્ડ કરવામાં આવ્યા, જેનાથી કામગીરી પર દબાણ વધ્યું.
ત્યારબાદ, ભારત-પાકિસ્તાન સંઘર્ષને કારણે પાકિસ્તાની હવાઈ ક્ષેત્ર બંધ થવાથી ભારતીય એરલાઈન્સની આંતરરાષ્ટ્રીય ફ્લાઈટ્સ પર માઠી અસર પડી હતી. પશ્ચિમ એશિયામાં યુદ્ધને કારણે પડકારો વધુ જટિલ બન્યા, જેનાથી ઈંધણના ખર્ચમાં વધારો થયો, ફ્લાઈટનો સમય લંબાયો અને સંભવિત રૂટ્સ મર્યાદિત બન્યા.
ટાટાના નેજા હેઠળના ચાર વર્ષના ટર્નઅરાઉન્ડ પ્લાન છતાં, એર ઈન્ડિયાનો ઇં૪૦૦ મિલિયનનો એરક્રાફ્ટ રિટ્રોફિટ પ્રોગ્રામ તેના નિર્ધારિત સમય કરતાં બે વર્ષ પાછળ ચાલી રહ્યો છે, તેમ વિલ્સને અગાઉ મિન્ટને જણાવ્યું હતું. આ વિલંબને કારણે ફ્લીટ અપગ્રેડ અને આંતરરાષ્ટ્રીય વિસ્તરણની ગતિ ધીમી પડી છે.
એર ઈન્ડિયામાં આ ફેરફાર એવા સમયે આવ્યો છે જ્યારે દેશની સૌથી મોટી કેરિયર ઈન્ડિગો (IndiGo) એ બ્રિટિશ એરવેઝના ભૂતપૂર્વ CEO વિલિયમ વોલ્શને નવા CEO તરીકે અને એર ઈન્ડિયા એક્સપ્રેસના ભૂતપૂર્વ CEO આલોક સિંહને તેના ચીફ સ્ટ્રેટેજી ઓફિસર તરીકે નિયુક્ત કર્યા છે.
એર ઈન્ડિયાએ જાહેરાત કરી છે કે સતત થઈ રહેલી ખોટ અને ગયા વર્ષે થયેલા વિમાન અકસ્માત (જેમાં ૨૬૦ લોકોના મોત થયા હતા) બાદ વધેલી નિયામક તપાસ વચ્ચે કેમ્પબેલ વિલ્સને CEO અને મેનેજિંગ ડિરેક્ટર પદેથી રાજીનામું આપ્યું છે. વિલ્સને ૨૦૨૪માં જ એન. ચંદ્રશેખરનને તેમના આ નિર્ણય વિશે જાણ કરી હતી અને તેમના અનુગામીની નિમણૂક ન થાય ત્યાં સુધી તેઓ પદ પર રહેશે.
એર ઈન્ડિયાએ મંગળવારે જણાવ્યું હતું કે, કેમ્પબેલ વિલ્સને CEO અને મેનેજિંગ ડિરેક્ટર પદેથી રાજીનામું આપ્યું છે. એરલાઇન હાલમાં આર્થિક ખોટ અને ગયા વર્ષના જીવલેણ અકસ્માત બાદ કડક તપાસનો સામનો કરી રહી છે.
વિલ્સને એક નિવેદનમાં જણાવ્યું હતું કે, ”એર ઈન્ડિયાના ઉત્થાનના આગામી તબક્કા માટે સુકાન સોંપવાનો આ યોગ્ય સમય છે.” એરલાઇને હવે નવા CEOની શોધ માટે એક પેનલની રચના કરી છે.
એક નોંધમાં વિલ્સને જણાવ્યું હતું કે, એર ઈન્ડિયાના ખાનગીકરણ પછીના ચાર વર્ષમાં ચાર એરલાઇન્સનું સફળ વિલીનીકરણ થયું છે અને જાહેર ક્ષેત્રમાંથી ખાનગી ક્ષેત્રની કાર્યપદ્ધતિમાં પરિવર્તન આવ્યું છે.
”સિસ્ટમ્સનું સંપૂર્ણ આધુનિકીકરણ કરવામાં આવ્યું છે, નવા ઉત્પાદનો લોન્ચ થયા છે અને સેવામાં સુધારો થયો છે.”
વિલ્સને વધુમાં કહ્યું, ”પાયાના આ કાર્યો હવે સ્થિર થઈ રહ્યા છે અને ૨૦૨૭થી લગભગ ૬૦૦ વિમાનોના નવા ઓર્ડરની ડિલિવરી શરૂ થાય તે પહેલાં, મારા માટે સુકાન સોંપવાનો આ યોગ્ય સમય છે. એર ઈન્ડિયાના ઇતિહાસના આ પ્રકરણમાં નાનકડી ભૂમિકા ભજવવી એ મારા માટે ગૌરવની વાત છે.”
ન્યુઝીલેન્ડમાં જન્મેલા વિલ્સનનો કાર્યકાળ ૨૦૨૭માં પૂરો થવાનો હતો, પરંતુ હાલમાં તેઓ છ મહિનાના નોટિસ પિરિયડ પર છે. ૨૦૨૨માં પદ સંભાળ્યા પછી, તેમણે સપ્લાય ચેઇનની અડચણો વચ્ચે એરલાઇનના એન્જિનિયરિંગ વિભાગ અને વિમાનોના નવીનીકરણમાં મહત્વની ભૂમિકા ભજવી હતી.
ટાટા સન્સના ચેરમેને કેમ્પબેલની પ્રશંસા કરી
ટાટા સન્સના ચેરમેન એન. ચંદ્રશેખરને જણાવ્યું હતું કે, ”બોર્ડ વતી, હું છેલ્લા ચાર વર્ષમાં કેમ્પબેલના નેતૃત્વ અને યોગદાનની ઊંડી પ્રશંસા કરું છું. કોવિડ પછીની સપ્લાય ચેઇન મર્યાદાઓ અને ભૌગોલિક રાજકીય પડકારો છતાં કેમ્પબેલ અને તેમની ટીમે મક્કમતા બતાવી છે અને નવી એર ઈન્ડિયાના નિર્માણ માટે કામ કર્યું છે.”
એર ઈન્ડિયા પાસે હાલમાં ૧૯૧ વિમાનોનો કાફલો છે અને તેણે ૫૦૦ થી વધુ વિમાનોના ઓર્ડર આપ્યા છે. જોકે, ૨૦૨૨ માં ટાટા ગૂ્રપ દ્વારા ખરીદ્યા પછી એરલાઇન સતત ખોટમાં છે. ગયા વર્ષે પાકિસ્તાને ભારતીય કેરિયર્સ માટે હવાઈ ક્ષેત્ર બંધ કર્યા પછી આર્થિક દબાણ વધ્યું છે. નાણાકીય વર્ષ ૨૦૨૪-૨૦૨૫માં એર ઈન્ડિયા અને એર ઈન્ડિયા એક્સપ્રેસે કુલ ૯,૮૦૮ કરોડ (ઇં૧.૦૫ બિલિયન) ની ખોટ નોંધાવી છે.
