મ્યૂલ એકાઉન્ટથી સાયબર ફ્રોડના નાણાં વિદેશી મોકલતી
મુખ્ય સૂત્રધાર સુધી પહોંચવા પોલીસે ઝડપાયેલા શખ્સોના ફરધર રિમાન્ડની માંગણી સાથે કોર્ટમાં રજૂ કર્યાં
ભાવનગર: મ્યૂલ એકાઉન્ટ મારફત સાયબર ફ્રોડના નાણાં વિદેશી મોકલતી આંતરરાજ્ય સિન્ડિકેટનો ભાવનગર પોલીસ પર્દાફાશ કર્યો હતો. પોલીસે આ મામલે ૯ આરોપીઓને ઝડપી લઈ મુખ્ય સૂત્રધાર સુધી પહોંચવા માટે તેમના ફરધર રિમાન્ડની માંગણી સાથે કોર્ટમાં રજૂ કરતા કોર્ટે તમામના તા.૨૦ સુધીના રિમાન્ડ મંજૂર કર્યાં છે.
કમિશનની લાલચે સામાન્ય લોકોના નામે બેંક એકાઉન્ટ ખોલાવી સાયબર ફ્રોડના પૈસા જે-તે એકાઉન્ટમાં ટ્રાન્સફર કરી આ પૈસા આંગડિયા અને હવાલા મારફતે વિદેશમાં મોકલી દેતી ઓર્ગેનાઈઝ્ડ ક્રાઈમ સિન્ડિકેટનો ભાવનનગર પોલીસે પર્દાફાશ કરી આ સિન્ડિકેટ સાથે જોડાયેલા આર્યન ઉર્ફે લખન શોભરાજભાઈ જોસેતા, શૈલેષ ઉર્ફે ભુરો હિરાભાઈ ચૌધરી, રાહુલ ગોવિંદભાઇ ગોહેલ, શાફીન યુનુસભાઈ અબ્દુલભાઈ કુરેશી, માહીન યુનુસભાઈ અબ્દુલભાઈ કુરેશી, મીહિર ભગવાનભાઈ પાંચાભાઈ સરવૈયા, અમન ઇસુફભાઇ અબ્દુલકાદર ઓફથા, હર્ષદસિંહ અનકુભા સરવૈયા અને દિપક વિઠ્ઠલભાઈ ગોહિલની ધરપકડ કરી છે. જ્યારે માસ્ટર માઈન્ડ દશરથ રામજીભાઈ ધાંધલ્યા હજૂ ફરાર છે, જે દુબઈ ભાગી ગયો હોવાની આશંકા વ્યક્ત કરવામાં આવી રહી છે. બીજી તરફ આ સમગ્ર સિન્ડિકેટના મુળ સુધી અને મુખ્ય સૂત્રધાર સુધી પહોંચવા માટે ભાવનગર પોલીસે ઝડપાયેલા ૯ આરોપીઓના ફરધર રિમાન્ડની માંગણી સાથે ગુજસીટોક કોર્ટ રાજકોટ ખાતે રજૂ કરવામાં આવતા કોર્ટે તમામ આરોપીઓના આગામી તા.૨૦ સુધીના રિમાન્ડ મજૂર કર્યાં છે.
