મુંબઈ : મુંબઈ ઝવેરીબજારમાં આજે શનિવારના કારણે બુલીયન બજાર સત્તાવાર બંધ રહી હતી. જોકે બંધ બજારે મિશ્ર હવામાન વચ્ચે સોનાના ભાવ ઘટયા હતા જ્યારે ચાંદીના ભાવ વધી આવ્યા હતા. વિશ્વબજારના સમાચાર પણ સોના- ચાંદીમાં સામસામા રાહ બતાવી રહ્યા હતા.
વિશ્વબજારમાં સોનાના ભાવ ઔંશના ૪૭૭૦થી ૪૭૭૧ વાળા ઘટી ૪૭૪૯થી ૪૭૫૦ ડોલર છેલ્લે સપ્તાહના અંતે રહ્યા હતા જ્યારે વૈશ્વિક ચાંદીના ભાવ ઔંશના ૭૫.૭૮થી ૭૫.૭૯થી વધી ૭૫.૮૭થી ૭૫.૮૮ ડોલર છેલ્લા રહ્યા હતા. દરમિયાન, મુંબઈ બુલીયન બજારમાં આજે સોનાના ભાવ જીએસટી વગર ૯૯૫ના ૧૦ ગ્રામના રૂ.૧૪૯૭૨૫ વાળા રૂ.૧૪૯૦૦૦ રહ્યા હતા જ્યારે ૯૯૯ના ભાવ રૂ.૧૫૦૩૨૭ વાળા રૂ.૧૪૯૬૦૦ રહ્યા હતા. મુંબઈ ચાંદીના ભાવ કિલોના જીએસટી વગર રૂ.૨૩૯૯૩૪ વાળા રૂ.૨૪૨૦૦૦ બોલા રહ્યા હતા.
દરમિયાન, વિશ્વબજારમાં ડોલરનો ગ્લોબલ ઈન્ડેક્સ ૯૮.૯૫ વાળો ઉંચામાં ૯૯.૦૧ થયા પછી નીચામાં આ ઈન્ડેક્સ ૯૮.૫૪ થઈ છેલ્લે ૯૮.૭૦ રહ્યાના નિર્દેશો હતા. અમેરિકામાં ફુગાવો ઉંચો જતાં તથા બેરોજગારીના દાવા વધતાં ત્યાં હવે વ્યાજના દરમાં ઘટાડો કરવાના બદલે વધારો કરવાની વાતો વહેતી થયાના વાવડ મળ્યા હતા. દરમિયાન, મુંબઈ કરન્સી બજારમાં આજે બંધ બજારે રૂપિયા સામે ડોલરના ભાવ રૂ.૯૨.૬૮ વાળા વધી રૂ.૯૨.૯૦ આસપાસ બોલાઈ રહ્યા હતા.
દરમિયાન, અમદાવાદ ઝવેરીબજારમાં આજે સોનાના ભાવ ૯૯૫ના રૂ.૧૫૪૭૦૦ તથા ૯૯૯ના રૂ.૧૫૫૦૦૦ રહ્યા હતા જ્યારે અમદાવાદ ચાંદીના ભાવ રૂ.૧૦૦૦ વધી રૂ.૨૩૭૦૦૦ રહ્યા હતા. વિશ્વબજારમાં ક્રૂડતેલના ભાવ બ્રેન્ટના બેરલના ૯૫.૩૯ વાળા ઉંચામાં ૯૮.૨૬ તથા નીચામાં ભાવ ૯૪.૨૦ થઈ છેલ્લે ભાવ ૯૫.૨૦ ડોલર રહ્યા હતા. યુએસ ક્રૂડના ભાવ ૯૭.૫૬ વાળા ઉંચામાં ૧૦૦.૪૨ તથા નીચામાં ભાવ ૯૫.૫૧ થઈ છેલ્લે ભાવ ૯૬.૫૭ ડોલર રહ્યા હતા.
યુએસ ક્રૂડના ભાવ આ સપ્તાહમાં ૧૩થી ૧૪ ટકા તૂટયા છે તથા વિકલી ઘટાડામાં છ વર્ષનો રેકોર્ડ તૂટયો છે. દરમિયાન, રશિયનું ઓઈલ ખરીદવા વિવિધ દેશોને અમેરિકા દ્વારા આપવામાં આવેલી ૩૦ દિવસની મુદત પુરી થતાં હવે આવી મુદત વધારવામાં આવશે એવી શક્યતા જાણકારો બતાવી રહ્યા હતા.
દરમિયાન, વિશ્વબજારમાં પ્લેટીનમના ભાવ ઔંશના ૨૦૮૧થી ૨૦૮૨ વાળા ઘટી ૨૦૪૮થી ૨૦૪૯ ડોલર રહ્યા હતા જ્યારે પેલેડીયમના ભાવ ૧૫૩૦થી ૧૫૩૧ વાળા છેલ્લે ૧૫૨૬થી ૧૫૨૭ ડોલર રહ્યા હતા. વૈશ્વિક કોપરના ભાવ છેલ્લે ૨.૧૧ ટકા પ્લસમાં રહ્યા હતા. ચીનમાં કોપરની માગ વધ્યાના વાવડ હતા.
